លោក ដូណាល់ ត្រាំ ថារដ្ឋបាលរបស់លោកនឹងខិតខំប្រឹងប្រែង ដើម្បីបង្កើតវ៉ាក់សាំងការពារកូវីដ១៩ ឱ្យរួចរាល់នៅចុងឆ្នាំនេះ

យោងតាមការចុះផ្សាយរបស់សារព័ត៌មាន NHK បានឱ្យដឹងថាប្រធានាធិបតីអាមេរិកលោក ដូណាល់ ត្រាំ មានប្រសាសន៍ថា រដ្ឋបាលរបស់លោកនឹងខិតខំប្រឹងប្រែងឱ្យបានឆាប់រហ័ស នៅក្នុងការបង្កើតវ៉ាក់សាំងការពារវីរុស COVID-19 នៅចុងឆ្នាំនេះ។ លោក ដូណាល់ ត្រាំ បានប្រកាសគម្រោងនេះនៅឯសេតវិមានកាលពីថ្ងៃសុក្រ ដោយបាននិយាយថា គោលបំណងគឺដើម្បីបញ្ចប់ការអភិវឌ្ឍ ហើយបន្ទាប់មកផលិតនិងចែកចាយវ៉ាក់សាំងឱ្យលឿនតាមដែលអាចធ្វើទៅបាន។ គាត់បាននិយាយថា៖ «យើងចង់ដឹងថាតើយើងអាចធ្វើវាបានមុនដំណាច់ឆ្នាំនេះទេ»។

ប្រធានាធិបតីបានអួតពីកិច្ចខិតខំប្រឹងប្រែងនេះថា មិនដូចអ្វីដែលអាមេរិកបានឃើញចាប់តាំងពីគម្រោង Manhattan ដោយសម្អាងលើកម្មវិធីសង្គ្រាមលោកលើកទី២ ដើម្បីបង្កើតគ្រាប់បែកបរមាណូដំបូង។ លោក ដូណាល់ ត្រាំ បានសន្យាគាំទ្រថវិកាទាំងស្រុងសម្រាប់ការអភិវឌ្ឍវ៉ាក់សាំង និងធ្វើឱ្យមាននីតិវិធីសាមញ្ញសម្រាប់ការអនុម័តបទប្បញ្ញត្តិ។ ប៉ុន្តែអ្នកវិទ្យាសាស្ត្របានសម្តែងការសង្ស័យអំពីការរំពឹងទុកនេះ ដោយភាគច្រើនរំពឹងថាការអភិវឌ្ឍន៍វ៉ាក់សាំងនឹងត្រូវចំណាយពេលរហូតដល់ឆ្នាំក្រោយ៕

អត្ថបទ៖ លីដា
ប្រភព៖ NHK