ប្រធានាធិបតីអាមេរិកលោក​​ ដូណាល់​ ត្រាំ ព្រមានដាក់ពង្រាយកម្លាំងយោធា ប្រសិនបើភាពចលាចលមិនស្ងប់ស្ងាត់ទៅវិញ

នៅក្នុងការថ្លែងសុន្ទរកថាដ៏គួរឱ្យភ្ញាក់ផ្អើលមួយ ប្រធានាធិបតីអាមេរិកលោក ដូណាល់ ត្រាំ បានប្រកាសថា លោកនឹងពង្រាយកម្លាំងយោធាដើម្បីបញ្ឈប់ភាពចលាចលនៅទីក្រុងវ៉ាស៊ីនតោន ហើយបាននិយាយថាលោកនឹងធ្វើអន្តរាគមន៍នៅគ្រប់ទីកន្លែងទាំងអស់ ដែលអាជ្ញាធរមូលដ្ឋាននៅទីនោះខកខានក្នុងការស្តារសណ្តាប់ធ្នាប់ បន្ទាប់ពីមានកុបកម្មជាច្រើនថ្ងៃកន្លងមកនេះ។ លោក ដូណាល់​ ត្រាំ បានបង្ហាញខ្លួននៅក្នុងសួន Rose Garden នៅល្ងាចថ្ងៃច័ន្ទ ដោយបានប្រកាសថា សហរដ្ឋអាមេរិកត្រូវបានត្រួតត្រាដោយពួក «ភេរវកម្មក្នុងស្រុក» នៃក្រុមអនាធិបតេយ្យអាជីពនិងក្រុមមនុស្សឃោរឃៅ ដែលបានលង់នឹងការទាមទារយុត្តិធម៌ជុំវិញការស្លាប់របស់លោក George Floyd ជនជាតិអាមេរិកកាត់អាហ្វ្រិក ដែលត្រូវបានសម្លាប់ដោយប៉ូលីសនៅ Minneapolis រដ្ឋ Minnesota កាលពីថ្ងៃច័ន្ទ។

លោក ដូណាល់ ត្រាំ បាននិយាយថា ទូទាំងប្រទេសមានការខឹងសម្បារយ៉ាងខ្លាំងចំពោះការស្លាប់ដ៏ឃោរឃៅរបស់ George Floyd ប៉ុន្តែការតវ៉ាចាប់តាំងពីពេលនោះមកបានក្លាយជាអំពើហិង្សា។ លោកបាននិយាយថា នៅក្នុងទីក្រុងវ៉ាស៊ីនតោនតែមួយ មានក្រុមកុបករបានបំផ្លាញវិមាន Lincoln Memorial និងបូជនីយដ្ឋាន WWII និងបានដុតបំផ្លាញព្រះវិហារប្រវត្តិសាស្ត្រមួយនៅជិតសេតវិមាន។ លោកបានមានប្រសាសន៍ថា៖«នេះមិនមែនជាការតវ៉ាដោយសន្តិវិធីទេ នេះជាអំពើភេរវកម្មក្នុងគ្រួសារ»។ ដោយសុំឱ្យមានការបញ្ចប់កុប្បកម្មនិងភាពគ្មានច្បាប់ទម្លាប់ លោកប្រធានាធិបតីបាននិយាយថា លោកបានផ្តល់អនុសាសន៍ដល់អភិបាលរដ្ឋទាំងអស់ឱ្យដាក់ពង្រាយឆ្មាំជាតិឱ្យបានគ្រប់គ្រាន់ ដើម្បីគ្រប់គ្រងលើដងផ្លូវ និងបិទកុប្បកម្ម។ ប្រសិនបើពួកគេខកខានមិនបានធ្វើដូច្នេះទេ លោកនិយាយថានឹងដាក់ពង្រាយកងទ័ពសហរដ្ឋអាមេរិក និងដោះស្រាយវាឱ្យបានឆាប់រហ័ស។

លោកបន្ថែមដែរថា ទាហានអាមេរិកប្រដាប់ដោយអាវុធ ត្រូវបានបញ្ជូនទៅកាន់តាមដងផ្លូវនានានៃរដ្ឋធានីវ៉ាស៊ីនតោន ដើម្បីបញ្ឈប់ការបះបោរ ការលួចប្លន់ ការបំផ្លិចបំផ្លាញ ការបំពាន និងការបំផ្លិចបំផ្លាញទ្រព្យសម្បត្តិ។ អ្នករៀបចំ “ភេរវកម្ម” នឹងត្រូវប្រឈមមុខនឹងការដាក់ទណ្ឌកម្មព្រហ្មទណ្ឌធ្ងន់ធ្ងរ រួមទាំងការជាប់ពន្ធនាគារ៕

អត្ថបទ៖ លីដា
ប្រភព៖ RT