ក្រុមប្រឆាំងកុបកម្មនៅអាមេរិកចំនួន ៥៧នាក់ បានដាក់ពាក្យលាឈប់ទាំងអស់គ្នា ក្រោយមានករណីសមាជិកក្នុងក្រុម បានរុញលោកតាម្នាក់ឱ្យផ្ងារក្រោយបែកក្បាល
អន្តរជាតិ June 6, 2020 lyda

នៅពេលដែលបាតុកម្មនៅតែបន្តនៅទូទាំងសហរដ្ឋអាមេរិក ជុំវិញការស្លាប់របស់លោក George Floyd ថ្មីៗនេះមានហេតុការណ៍យ៉ាងរន្ធត់ថ្មីមួយទៀត ដោយក្រុមប្រឆាំងកុបកម្មនៅទីក្រុងបាហ្វហ្វាឡូ (Buffalo) នៃរដ្ឋញូវយ៉ក បានច្រានលោកតាចំណាស់ម្នាក់ឈ្មោះថា Martin Gugino អាយុ ៧៥ឆ្នាំ ឱ្យផ្ងារក្រោយបែកក្បាលហូរឈាមនៅនឹងកន្លែង កាលពីថ្ងៃទី០៥ ខែមិថុនា ឆ្នាំ២០២០ ម្សិលមិញនេះ។ វីដេអូនៃការរុញច្រានរបស់ប៉ូលីសប្រឆាំងកុបកម្មទៅលើលោកតាចំណាស់ បានល្បីសុះសាយពេញអ៉ីនធឺណេត ដែលនាំឱ្យឈានទៅដល់ការព្យួរការងារ និងស៊ើបអង្កេតលើប៉ូលីសកុបកម្មចំនួន ២នាក់ ហើយខណៈពេលនេះក្រុមប្រឆាំងកុបកម្មចំនួន ៥៧នាក់ បានដាក់ពាក្យលាឈប់ពីតួនាទីទាំងអស់។

បើយោងទៅតាមប្រភព Daily Mail បាននិយាយថា ពួកគេទាំង ៥៧នាក់ បានដាក់ពាក្យលាឈប់ពីតួនាទីជាក្រុមប្រឆាំងកុបកម្ម ប៉ុន្តែមិនបានឈប់ពីនាយកដ្ឋាន​ប៉ូ​លី​សទីក្រុងបាហ្វហ្វាឡូនោះទេ។ ពួកគេដាក់ពាក្យលាឈប់ដោយសារឈរនៅខាងប៉ូលីស ២ នាក់ផ្សេងទៀត ដែលកំពុងស្ថិតក្រោមការព្យួរការងារ និងស៊ើបអង្កេតទាក់ទងនឹងបទឧក្រិដ្ឋ ដែលបណ្ដាលឱ្យលោកតាបែកក្បាល។ ចំពោះករណីបែកក្បាលរបស់លោកតាចំណាស់ ដំបូងឡើយខាងនាយកដ្ឋានបានចេញសេចក្ដីប្រកាសថាគាត់ដួលខ្លួនឯង ប៉ុន្តែក្រោយពេលវីដេអូបែកធ្លាយទើបគេរកឃើញថា ប៉ូលីសចំនួន ២នាក់ មានជាប់ទាក់ទងនឹងការរុញច្រានគាត់ឱ្យផ្ងារក្រោយបែកក្បាលនេះ៕

អត្ថបទ៖ លីដា
ប្រភព៖ Daily Mail