ត្រឹមតែមួយថ្ងៃម្សិលមិញនេះប្រេស៊ីល មានអ្នកទទួលមរណភាព ដោយសារជំងឺកូវីដ ១៩ រហូតដល់ទៅ ១៤៨០ នាក់

ប្រេស៊ីល៖ យោងតាមការចុះផ្សាយនៅក្នុងសារព័ត៌មាន Channel News Asia បានរាយការណ៍ថា កាលពីថ្ងៃចន្ទ ទី ១២ ខែមេសា ម្សិលមិញនេះ អាជ្ញាធរសុខាភិបាលនៃប្រទេសប្រេស៊ីលបានរកឃើញអ្នកស្លាប់ ដោយសារជំងឺកូវីដ ១៩ ក្នុងចំនួនដ៏ច្រើនបំផុតមួយ ពោលគឺត្រឹមតែរយៈពេល ២៤ ម៉ោងប្រេស៊ីលបានរកឃើញមានអ្នកស្លាប់រហូតដល់ទៅ ១ ៤៨០នាក់ឯណោះ។ តាមរយៈតួលេខអ្នកស្លាប់ដ៏ច្រើននេះក៏បានបន្ថែមសម្ពាធថ្មីមួយទៀតចំពោះរដ្ឋាភិបាលប្រេស៊ីលផងដែរ ដោយមានមតិសាធារណៈជាច្រើនចង់ឲ្យមានការតាមដានជាពិសេសនិងជាក់លាក់មួយអំពីរបៀបដែលរដ្ឋាភិបាលប្រស៊ីលធ្វើការដោះស្រាយជុំវិញការរាតត្បាតជំងឺកូវីដ ១៩  ដ្បិតនាពេលកន្លងមកវិធានការរបស់អាជ្ញាធរប្រេស៊ីលហាក់មិនសូវមានប្រសិទ្ធភាពទាល់តែសោះក្នុងការគ្រប់គ្រងជំងឺកូវីដ ១៩ ។

គួររម្លឹកជូនថា នៅក្នុងរយៈពេលប៉ុន្មានសប្តាហ៍ចុងក្រោយនេះរលកនៃការរាតជំងឺកូវីដ ១៩ នៅទូទាំងប្រទេសប្រេស៊ីលហាក់កម្រើកឡើងវិញយ៉ាងខ្លាំង ហើយគិតជាសរុបរួមគឺមកទល់នឹងពេលនេះប្រទេសប្រេស៊ីលមានអ្នកឆ្លងជំងឺកូវីដ ១៩ សរុបជាង ១៣,៥ លាននាក់ ខណៈអ្នកស្លាប់វិញមានចំនួនជាង ៣៥ ម៉ឺននាក់ផងដែរ។ យ៉ាងណាក្តី បើគេធ្វើការប្រៀបធៀបតួលេខអ្នកឆ្លងជំងឺកូវីដ ១៩ នៅក្នុងប្រទេសប្រេស៊ីលជាមួយនឹងប្រទេសឥណ្ឌា គឺប្រទេសឥណ្ឌាមានអ្នកឆ្លងច្រើនជាងតែមានអ្នកស្លាប់តិចជាង ដោយគិតត្រឹមពេលនេះឥណ្ឌាមានតួលេខអ្នកឆ្លងជាង ១៣,៦៨ លាននាក់និងស្លាប់ត្រឹមតែជាង ១៧ ម៉ឺននាក់ប៉ុណ្ណោះ៕

អត្ថបទ៖ ភក្តី

ប្រភព៖ Channel News Asia