ថ្ងៃនេះ ថៃរកឃើញអ្នកឆ្លងកូវីដ ១៩ ចំនួន ២,២៥៦នាក់និងមរណភាពចំនួន ៣០នាក់

ថៃ៖ យោងតាមការចុះផ្សាយនៅក្នុងសារព័ត៌មាន The Thaiger បានឲ្យដឹងថា នៅក្នុងថ្ងៃសុក្រ ទី ១៤ ឧសភានេះ អាជ្ញាធរសុខាភិបាលថៃបានរកឃើញអ្នកឆ្លងជំងឺកូវីដ ១៩ ចំនួន ២,២៥៦នាក់ និងបានរកឃើញអ្នកស្លាប់ដោយជំងឺកូវីដ ១៩ ចំនួន ៣០នាក់បន្ថែមទៀតផងដែរ។ នៅក្នុងចំណោមអ្នកឆ្លងថ្មីនៅក្នុងថ្ងៃសុក្រនេះមានអ្នកឆ្លងចំនួន ១៨៣ នាក់គឺជាអ្នកទោសដែលកំពុងជាប់ឃុំនៅក្នុងមន្ទីរឃុំឃាំងធំៗចំនួន ២ ក្នុងក្រុងបាងកកគឺពន្ធនាគារក្រុងបាងកកនិងមណ្ឌលកែប្រែខ្លួនសម្រាប់មនុស្សស្រី។

ប្រភពខាងលើបានបញ្ជាក់ផងដែរថា ភាគច្រើននៃអ្នកឆ្លងជំងឺកូវីដ ១៩ ខាងលើនេះគឺត្រូវបានរកឃើញតាមរយៈការធ្វើតេស្តឆាប់រហ័សនៅតាមមន្ទីរពេទ្យនិងសហគមន៍ក្នុងក្រុងបាងកក។ គិតជាសរុបរួមមកទល់នឹងពេលនេះប្រទេសថៃបានរកឃើញអ្នកឆ្លងជំងឺកូវីដ ១៩ សរុបចំនួន ៩៦,០៥០ នាក់ និងស្លាប់សរុបចំនួន ៥៤៨ នាក់ផងដែរ៕

អត្ថបទ៖ ភក្តី

ប្រភព៖ The Thaiger