កីឡាករបាល់ទាត់ម៉ាឡេស៊ី ២រូបដែលបានចូលលេងទល់នឹងកម្ពុជាក្នុងពានរង្វាន់ AFF Suzuki Cup 2020 កាលដើមសប្តាហ៍នេះបានតេស្តវិជ្ជមានកូវីដ ១៩

សិង្ហបុរី៖ យោងតាមការចុះផ្សាយនៅក្នុងបណ្តាញសារព័ត៌មាន Channel News Asia បានឲ្យដឹងនៅព្រឹកថ្ងៃសុក្រ ទី១០ ខែធ្នូនេះថា សមាជិកចំនួន ២រូបនៃក្រុមបាល់ទាត់ជម្រើសជាតិម៉ាឡេស៊ីដែលកំពុងចូលរួមប្រកួតក្នុងពានរង្វាន់ AFF Suzuki Cup 2020​ ក្នុងប្រទេសសិង្ហបុរីត្រូវបានធ្វើតេស្តវិជ្ជមានជំងឺកូវីដ ១៩ កាលពីល្ងាចថ្ងៃទី៩​ ខែធ្នូ ម្សិលមិញនេះ។ បើតាមលោក Tan Cheng Hoe ដែលជាគ្រូបង្វឹកក្រុមកីឡាករជម្រើសជាតិម៉ាឡេស៊ីបានបញ្ជាក់ថា កីឡាករទាំង ២រូបនោះរួមមានកីឡាករ Quentin Cheng ដែលលេងជាខ្សែការពារ និងម្នាក់ទៀតគឺជាខ្សែបម្រើស្លាបឈ្មោះ Akhyar Rashid។

គេនៅចាំបានថា ខ្សែបម្រើស្លាបឈ្មោះ Akhyar Rashid រូបនេះ បានទទួលពានជាកីឡាករលេងល្អបំផុតក្នុងអំឡុងការក្រួតរវាងក្រុមជម្រើសជាតិម៉ាឡេស៊ីនិងក្រុមជម្រើសជាតិកម្ពុជា កាលពីថ្ងៃចន្ទ ទី៦ ខែធ្នូកន្លងទៅ ដោយពេលនោះម៉ាឡេស៊ីបានយកឈ្នះកម្ពុជាក្នុងលទ្ធផល ៣-១។ គួររម្លឹកជូនថា កាលពីថ្ងៃអាទិត្យចុងសប្តាហ៍កន្លងទៅនេះក៏មានក្រុមកីឡាករបាល់ទាត់ជម្រើសជាតិម៉ាឡេស៊ីចំនួន ២រូបបានធ្វើតេស្តវិជ្ជមានជំងឺកូវីដ ១៩ ផងដែរ ដូចនេះគិតត្រឹមពេលនេះគឺមានកីឡាករម៉ាឡេស៊ីចំនួន ៤នាក់ហើយក្នុងចំណោមកីឡាករសរុប ២៤នាក់ ដែលបានតេស្តវិជ្ជមានជំងឺកូវីដ ១៩។ កីឡាករដែលត្រូវបានធ្វើតេស្តវិជ្ជមានកូវីដ ១៩ទាំងអស់នេះត្រូវតម្រូវឲ្យនៅដាច់ដោយឡែកហើយពួកគេនឹងត្រូវអវត្តមានក្នុងការប្រកួតបន្ទាប់។ សូមបញ្ជាក់ជូនថា រហូតមកទល់នឹងពេលនេះគេនៅមិនទាន់ដឹងថា មានក្រុមជម្រើសជាតិកម្ពុជាណាម្នាក់បានឆ្លងជំងឺកូវីដ ១៩ ពីក្រុមជម្រើសជាតិម៉ាឡេស៊ីដែរឬក៏អត់នោះទេ៕

អត្ថបទ៖ ភក្តី

ប្រភព៖ Channel News Asia