ជារឿងមួយដ៏គួរឲ្យអស់សំណើច និងហួសចិត្តខ្លាំង ចំពោះវីដេអូមួយពីករណីរបស់រថយន្ត ២គ្រឿងស៊ីផ្លេដេញគ្នាមិនព្រមចាញ់ ត្រូវបានគេចែកចាយពេញព្រាតលើបណ្ដាញហ្វេសប៊ុក បង្កើតជាការចាប់អារម្មណ៍ដល់មហាជន។ ជាក់ស្ដែង វីដេអូប្រមាណជាង ៣នាទី បង្ហាញពីសកម្មភាពរថយន្តម៉ាក  Lexus និង Tundra បើកក្នុងទិសដៅបញ្ចា្រសទិសគ្នា។ ស្រាប់តែពេលដល់ចំនុចជួបគ្នា គ្មានរថយន្តណា ព្រមចៀសផ្លូវឲ្យរថយន្តណាឡើយ បែរជាឈប់ទល់មុខគ្នា ស៊ីផ្លេដេញកងរំពង ទាក់ទាញឲ្យអ្នកដំណើរជិះកាត់នោះងាកមើលគ្រប់គ្នាតែម្ដង។

ទន្ទឹមនឹងគ្នានេះ ក៏មានមតិជាច្រើនបានរិះគន់ទៅលើរថយន្តម៉ាក​ Lexus ដែលជិះខុសគន្លង រីឯខ្លះទៀតបានបន្ទោសទៅឡានម៉ាក Tundra ដែលបើកបញ្ច្រាសដោយសារតែផ្លូវដែលកើតហេតុគឺជាផ្លូវឯកទិស​។ ប៉ុន្តែករណីខាងលើ យើងពុំអាចកាត់ក្ដីឲ្យបានត្រឹមត្រូវឡើយ ត្បិតម្ចាស់វីដេអូពុំបានបញ្ជាក់ថាផ្លូវនោះមានទីតាំងនៅទីណាឲ្យប្រាកដឡើយ។ យ៉ាងណាមិញ ជាចុងក្រោយរថយន្តម៉ាក Tundra ពណ៌ស ក៏ព្រមដកថយ បើកផ្លូវឲ្យឡាន Lexus ទៅផងដែរ។ ចង់ដឹងច្បាស់ សូមទស្សនាវីដេអូខាងក្រោម៖