លោកស្រី Liz Truss នឹងជំនួសតំណែងលោក Boris Johnson ក្នុងនាមជានាយករដ្ឋមន្ត្រីថ្មីរបស់អង់គ្លេស

គណបក្សអភិរក្សរបស់អង់គ្លេសបានប្រកាសកាលពីថ្ងៃចន្ទថា សមាជិករបស់ខ្លួនបានជ្រើសរើសលោកស្រី Liz Truss (លីស ត្រាស់) ឱ្យធ្វើជាមេដឹកនាំជំនួសលោក Boris Johnson ដែលមានន័យថា លោកស្រីនឹងត្រូវឡើងធ្វើជានាយករដ្ឋមន្ត្រីបន្ទាប់របស់ចក្រភពអង់គ្លេស។ លោកស្រី Truss អាយុ ៤៧ឆ្នាំ បានយកឈ្នះលើលោក Rishi Sunak ដែលជាអតីតអធិការបតីរបស់អង់គ្លេស ដែលបានលាលែងពីតំណែងនៅកំឡុងពេលមានភាពចម្រូងចម្រាសពាក់ព័ន្ធនឹងលោក Boris Johnson។

លោកស្រីបានក្លាយជានាយករដ្ឋមន្ត្រីទី៤របស់ចក្រភពអង់គ្លេស ក្នុងរយៈពេល ៦ឆ្នាំចុងក្រោយ និងជាមេដឹកនាំស្ត្រីទី៣ បន្ទាប់ពីលោកស្រី Margaret Thatcher និង Theresa May ។

មិនខុសពីអ្នកពីមុនៗទេ លោកស្រីនឹងត្រូវបានស្វាគមន៍ដោយបញ្ហាជាច្រើនរួមមាន៖ អតិផរណា វិបត្តិសេដ្ឋកិច្ច ភាពចលាចលនៃកម្លាំងពលកម្ម ការកើនឡើងវិក័យប័ត្រថាមពលក្នុងគ្រួសារ និងការខ្វះខាតប្រេងឥន្ធនៈ ដែលអាចកើតមានក្នុងរដូវរងារនេះ។ លោកស្រីក៏ត្រូវតែជួសជុលគណបក្សមួយ ដែលបានបែកបាក់គ្នាយ៉ាងខ្លាំង បន្ទាប់ពីការកាន់កាប់រយៈពេល ៣ឆ្នាំ ដ៏ច្របូកច្របល់របស់លោក Johnson ដែលបានឈានដល់កម្រិតកំពូលនៅក្នុងឆ្នាំ២០១៩ ជាមួយនឹងជ័យជម្នះការបោះឆ្នោតសកលយ៉ាងភ្លូកទឹកភ្លូកដី ប៉ុន្តែបានធ្លាក់ចូលទៅក្នុងរឿងអាស្រូវ ដែលមិនចេះឈប់ឈរបន្ទាប់ពីនោះ៕

អត្ថបទ៖ លីដា
ប្រភព៖ New York Times