សហរដ្ឋ​អាមេរិក​បាន​ដាក់​ទណ្ឌកម្ម​លើ​អង្គភាព​អ៉ីរ៉ង់​ចំនួន ៤ និង​បុគ្គល​ម្នាក់ ​ចំពោះ​ការ​ជាប់​ពាក់ព័ន្ធ​របស់​ពួកគេ​ នៅក្នុង​ការ​ផ្តល់​យន្តហោះ​គ្មានមនុស្សបើក​ដល់​រុស្ស៊ី នេះបើតាមការឱ្យដឹងរបស់ក្រសួង​រតនាគារ​អាមេរិក​ ដែលបាន​ធ្វើ​សេចក្តី​ប្រកាស​កាល​ពី​ថ្ងៃ​ព្រហស្បតិ៍។ អ្នកដែលស្ថិតក្រោម​ការ​ដាក់​ទណ្ឌកម្ម​នេះ នឹង​ត្រូវគេបង្កក​ទ្រព្យ​សម្បត្តិ​ និង​ផលប្រយោជន៍​ផ្សេងទៀត នៅ​ក្នុង​សហរដ្ឋ​អាមេរិក​។ ក្រសួងរតនាគារបាននិយាយថា អង្គភាពមួយក្នុងចំណោមអង្គភាពទាំង ៤ គឺក្រុមហ៊ុន Paravar Pars ដែលជាក្រុមហ៊ុនមានទំនាក់ទំនងយ៉ាងជិតស្និទ្ធ ជាមួយសាកលវិទ្យាល័យ Imam Hossein ដែលត្រូវបានគ្រប់គ្រងដោយកងឆ្មាំបដិវត្តន៍អ៉ីស្លាមរបស់អ៉ីរ៉ង់។

ក្រសួងបានចោទប្រកាន់ក្រុមហ៊ុនថា បានផលិត និងសាកល្បងយន្ដហោះគ្មានមនុស្សបើក ឬ UAV សម្រាប់ឆ្មាំបដិវត្តន៍អ៉ីស្លាមរបស់អ៉ីរ៉ង់ (IRGC)។ ក្រសួងរតនាគារក៏បាននិយាយផងដែរថា សេវាកម្មអាកាសយានដ្ឋាន Safiran ដែលមានមូលដ្ឋាននៅទីក្រុងតេអេរ៉ង់ បានសម្របសម្រួលជើងហោះហើរយោធារុស្ស៊ីរវាងអ៉ីរ៉ង់ និងរុស្ស៊ី រួមទាំងអ្នកដែលទាក់ទងនឹងការដឹកជញ្ជូន UAV បុគ្គលិក និងឧបករណ៍ពាក់ព័ន្ធទៅកាន់ប្រទេសរុស្ស៊ី។ មន្ត្រីក្រសួងរតនាគារជាន់ខ្ពស់និយាយថា៖«សហរដ្ឋអាមេរិកប្តេជ្ញាអនុវត្តយ៉ាងតឹងរ៉ឹងនូវទណ្ឌកម្មរបស់យើងប្រឆាំងនឹងរុស្ស៊ី និងអ៉ីរ៉ង់ និងទទួលខុសត្រូវចំពោះអ៉ីរ៉ង់ និងអ្នកដែលគាំទ្រសង្គ្រាមឈ្លានពានរបស់រុស្ស៊ីប្រឆាំងនឹងអ៊ុយក្រែន»៕

អត្ថបទ៖ លីដា
ប្រភព៖ NHK