វាមិនមែនជារឿងចម្លែកនោះទេដែលថាអាហារផ្អែមខ្លាំង មិនល្អសម្រាប់សុខភាពបេះដូង ប៉ុន្តែការសិក្សាមួយដោយ American College of Cardiology បានអះអាងថា សូម្បីតែគ្រាប់ធញ្ញជាតិរបស់យើង ក៏មិនល្អសម្រាប់សុខភាពផងដែរ។ បើយោងតាមការសិក្សាមួយ ដែលដឹកនាំដោយលោកវេជ្ជបណ្ឌិត Mohammad Amin Khajavi Gaskarei ទៅលើអ្នកចូលរួមរាប់ពាន់នាក់ បានឱ្យដឹងថា «ជាតិស្ករមិនល្អ» នៅក្នុងរបស់ទាំង ២ គឺមានកម្រិតប្រហាក់ប្រហែលគ្នា ដូច្នេះហើយវាក៏មិនល្អសម្រាប់សុខភាពបេះដូងដូចគ្នាផងដែរ។

វាបានមកពីការសិក្សាលើជនជាតិ​អ៊ីរ៉ង់​ចំនួន ២,៥០០ នាក់ ​ដែល​មាន​ប្រវត្តិ​មាន និង​គ្មាន​ជំងឺ​សរសៃឈាម​បេះដូង។ អ្នកចូលរួមត្រូវបានសាកសួរថា តើពួកគេញ៉ាំស្ករ និងគ្រាប់ធញ្ញជាតិញឹកញាប់ប៉ុណ្ណា ហើយការរកឃើញនេះគឺគួរឱ្យភ្ញាក់ផ្អើលខ្លាំងមែនទែន! ពោលគឺ នៅពេលដែលគ្រាប់ធញ្ញជាតិត្រូវបានចម្រាញ់ ដែលឆ្លងកាត់ដំណើរការផលិត និងបន្ថែមនូវសារធាតុទុកបានយូរ ពួកវានឹងចុះថយតម្លៃអាហារូបត្ថម្ភទៅតាមនោះដែរ។ នេះហើយជាហេតុផលដែលអ្នកគួរជ្រើសយកនំបុ័ង ជាជាតិអ្វីដែលពាក់ព័ន្ធនឹងគ្រាប់ធញ្ញជាតិផ្សេងៗទៀត ដោយសារវាមានជីវជាតិច្រើនជាង។

ជាងនេះទៅទៀត ការសិក្សាក៏បានរកឃើញដែរថា អ្នកដែលទទួលទានគ្រាប់ធញ្ញជាតិចម្រាញ់ច្រើនដូចជា អង្ករ ក៏មានហានិភ័យខ្ពស់នៃជំងឺសរសៃឈាមបេះដូង (PCAD) ផងដែរ ដោយសារថា គ្រាប់ធញ្ញជាតិចម្រាញ់ គឺរំលាយយ៉ាងឆាប់រហ័សនៅក្នុងខ្លួនយើង ដែលធ្វើឱ្យជាតិស្កររបស់យើងងាយនឹងកើនឡើង។ ប្រសិនបើ​វា​កើតឡើង​ជា​ប្រចាំ វា​អាច​បំផ្លាញ​សរសៃឈាម និង​បេះដូង ហើយ​នាំឱ្យ​មាន​កំណក​នៅ​ជញ្ជាំង​សរសៃឈាម​ទៀតផង៕

អត្ថបទ៖ លីដា
ប្រភព៖ Unilad