អង្គការសុខភាពពិភពលោក (WHO) បានចេញសេចក្តីជូនដំណឹងមួយកាលពីថ្ងៃពុធ ទី០៥ ខែតុលា ឆ្នាំ២០២២ ជុំវិញករណីទឹកស៊ីរ៉ូសម្រាប់កុមារ ដែលមានអាការក្អក និងផ្ដាសាយចំនួន ៤ ប្រភេទ ដែលផលិតដោយក្រុមហ៊ុនឱសថ Maiden របស់ប្រទេសឥណ្ឌា ដោយបានព្រមានថា ទឹកស៊ីរ៉ូទាំងនោះមានជាប់ពាក់ព័ន្ធនឹងការស្លាប់របស់កុមារចំនួន ៦៦ នាក់ នៅក្នុងប្រទេសហ្គាំប៊ី។ ទីភ្នាក់ងារសុខភាពអង្គការសហប្រជាជាតិមួយនេះ បានព្រមានថា ទឹកស៊ីរ៉ូដែលមានមេរោគអាចត្រូវបានគេចែកចាយទៅប្រទេសហ្គាំប៊ី ហើយវាក៏មានលទ្ធភាពខ្ពស់ ដែលទឹកស៊ីរ៉ូទាំងនោះបែកធ្លាយទៅទូទាំងសកល នេះបើតាមការចុះផ្សាយរបស់ទីភ្នាក់ងារ Channel News Asia ។

ប្រធានអង្គការ WHO លោក Tedros Adhanom Ghebreyesus បានប្រាប់អ្នកយកព័ត៌មានថា ទឹកស៊ីរ៉ូទាំងនោះត្រូវបានផ្សារភ្ជាប់ជាមួយនឹង «ករណីរបួសតម្រងនោមស្រួចស្រាវ និងការស្លាប់ចំនួន ៦៦ នាក់ ក្នុងចំណោមកុមារ ហើយវាគឺជារឿងដ៏សោកសៅបំផុតសម្រាប់គ្រួសាររបស់ពួកគេ»។ លោក Tedros បានបន្ថែមថា WHO ក៏កំពុងធ្វើការស៊ើបអង្កេតបន្ថែមជាមួយក្រុមហ៊ុន និងអាជ្ញាធរគ្រប់គ្រងនៅក្នុងប្រទេសឥណ្ឌា។ ផលិតផលមានបញ្ហាទាំង ៤ មានដូចជា៖ Promethazine Oral Solution, Kofexmalin Baby Cough Syrup, Makoff Baby Cough Syrup និង Magrip N Cold Syrup ។

អាជ្ញាធរ​ហ្គាំប៊ី​នាពេលថ្មីៗនេះ ក៏បាន​ចាប់​ផ្តើម​ប្រមូល​ថ្នាំ​ប៉ារ៉ាសេតាមុល និងទឹកស៊ីរ៉ូ​ប្រូមេតាហ្សីន ពី​គ្រួសារ​ជន​បទ​នៅ​តំបន់​ឆ្នេរ​ខាង​លិច និង​តំបន់​ទន្លេ​ខាង​លើរបស់ខ្លួន។ ការស៊ើបអង្កេតរបស់ក្រសួងសុខាភិបាលហ្គាំប៊ី ដែលបានចាប់ផ្តើមនៅក្នុងខែកក្កដា និងកំពុងបន្តដល់បច្ចុប្បន្ន ក៏បានលើកឡើងពីបាក់តេរី E. coli ដែលទំនងជាមូលហេតុនៅការផ្ទុះឡើង ការខ្សោយតម្រងនោមស្រួចស្រាវលើកុមារនេះ៕

អត្ថបទ៖ លីដា
ប្រភព៖ Channel News Asia