ព្រះមហាក្សត្រ និងព្រះមហាក្សត្រីរបស់ថៃ នឹងយាងទៅសួរសុខទុក្ខអ្នករងរបួសនៅក្នុងការបាញ់សម្លាប់យ៉ាងរង្គាលនៅខេត្ត Nong Bua Lamphu នៅថ្ងៃសុក្រនេះ។ ព្រះអង្គទាំងពីរត្រូវបានគេរំពឹងថា នឹងមកដល់អាកាសយានដ្ឋាន Udon Thani នៅពេលល្ងាច មុនពេលយាងទៅកាន់មន្ទីរពេទ្យ Nong Bua Lamphu និង Udon Thani។ ការវាយប្រហារដោយកាំភ្លើង និងកាំបិត ដោយអតីតប៉ូលីសម្នាក់កាលពីថ្ងៃព្រហស្បតិ៍ម្សិលមិញ បានចាប់ផ្តើមនៅឯកន្លែងមើលថែកុមារនៅក្នុងស្រុក Na Klang ហើយបានធ្វើឱ្យមនុស្ស ៣៨ នាក់បានស្លាប់ ដោយក្នុងនោះមាន ២៤ នាក់ជាកុមារ។ ជាមួយគ្នានេះមនុស្ស​ ១០​នាក់ ​បាន​រង​របួសនៅ​ក្នុង​ការ​វាយ​ប្រហារនោះ​ ហើយក្នុង​នោះ​មាន ៨​នាក់ ​ស្ថិត​ក្នុង​ស្ថានភាព​ធ្ងន់ធ្ងរ។

ខ្មាន់កាំភ្លើងត្រូវបានគេកំណត់អត្តសញ្ញាណថា ជាអតីតមន្ត្រីប៉ូលីសឈ្មោះ Panya Khamrab ដែលក្រោយមកបានធ្វើអត្តឃាតខ្លួន បន្ទាប់ពីបានសម្លាប់ប្រពន្ធ កូនប្រុស និងសាច់ញាតិ ២ នាក់ផ្សេងទៀត។ កាលពីល្ងាចថ្ងៃព្រហស្បតិ៍ ប្រធានក្រុមប្រឹក្សាឯកជន និងជាអតីតនាយករដ្ឋមន្ត្រី ឧត្តមសេនីយ៍ Surayud Chulanont បានទៅដល់ទីក្រុង Nong Bua Lamphu ដើម្បីសួរសុខទុក្ខអ្នករបួស និងត្រួតពិនិត្យប្រតិបត្តិការដោយផ្ទាល់។ លោក​បាន​មាន​ប្រសាសន៍​ថា ព្រះមហាក្សត្រ​នឹង​ផ្តល់​ការ​ឧបត្ថម្ភ​ដល់​ជនរងគ្រោះ​ទាំងអស់ និង​ក្រុម​គ្រួសារ​របស់​ពួកគេ។ នាយករដ្ឋមន្រ្តីលោក ប្រាយុទ្ធ ចាន់អូចា ក៏បានបញ្ជាឱ្យភ្នាក់ងាររដ្ឋាភិបាល និងសហគ្រាសរដ្ឋ បង្ហូតទង់ជាតិពាក់កណ្ដាលនៅថ្ងៃសុក្រនេះ។

អ្នកនាំពាក្យការិយាល័យនាយករដ្ឋមន្ត្រី លោក Anucha Burapachaisri បាននិយាយកាលពីថ្ងៃព្រហស្បតិ៍ថា នាយករដ្ឋមន្ត្រី ប្រាយុទ្ធ បានសម្តែងការសោកស្ដាយជាខ្លាំងចំពោះឧប្បត្តិហេតុនេះ ហើយបានស្នើឱ្យប្រជាជនថៃជួយគ្នាទៅវិញទៅមក នៅក្នុងកំឡុងពេលដ៏សោកស្ដាយមួយនេះ៕

អត្ថបទ៖ លីដា
ប្រភព៖ The Nation Thailand