លោក វ្ល៉ាឌីមៀ ពូទីន បានចោទអ៊ុយក្រែនថា ជាអ្នកនៅពីក្រោយការបំផ្ទុះស្ពានគ្រីមៀ ហើយបានហៅវាថា ជាអំពើភេរវកម្ម

ប្រធានាធិបតីរុស្ស៊ីលោក វ្ល៉ាឌីមៀ ពូទីន បានចោទប្រកាន់អ៊ុយក្រែន ពីបទរៀបចំអ្វីដែលលោកហៅថា «ការវាយប្រហារភេរវកម្ម» លើស្ពានដែកសំខាន់មួយ ដែលតភ្ជាប់ប្រទេសរុស្ស៊ី និងឧបទ្ទីបគ្រីមៀ ខណៈដែលលោក កំពុងរៀបចំកិច្ចប្រជុំក្រុមប្រឹក្សាសន្តិសុខរបស់លោក សម្រាប់ថ្ងៃចន្ទ ទី១០ ខែតុលានេះ។ លោក ពូទីន បាននិយាយកាលពីថ្ងៃអាទិត្យនៅក្នុងវីដេអូមួយនៅលើបណ្ដាញ Telegram របស់វិមានក្រឹមឡាំងថា៖«គ្មានអ្វីគួរឱ្យសង្ស័យទេ។ នេះគឺជាអំពើភេរវកម្ម ដែលមានគោលបំណងបំផ្លាញហេដ្ឋារចនាសម្ព័ន្ធស៊ីវិលដ៏សំខាន់។ នេះត្រូវបានបង្កើត អនុវត្ត និងបញ្ជាដោយសេវាកម្មពិសេសរបស់អ៊ុយក្រែន»។

អនុប្រធានក្រុមប្រឹក្សាសន្តិសុខ លោក Dmitry Medvedev បាននិយាយនៅមុនកិច្ចប្រជុំនៅថ្ងៃចន្ទថា ប្រទេសរុស្ស៊ីគួរតែសម្លាប់ពួក «ភេរវករ» ដែលទទួលខុសត្រូវចំពោះការវាយប្រហារនោះ។ លោកត្រូវបានដកស្រង់សម្តីដោយទីភ្នាក់ងារសារព័ត៌មានរដ្ឋ Tass ថា៖«រុស្ស៊ីអាចឆ្លើយតបបានតែចំពោះឧក្រិដ្ឋកម្មនេះ ដោយការសម្លាប់ភេរវករដោយផ្ទាល់ ដូចទៅនឹងទំនៀមទម្លាប់នៅកន្លែងផ្សេងទៀតក្នុងពិភពលោក។ នេះជាអ្វីដែលពលរដ្ឋរុស្ស៊ីរំពឹង»។

រំលឹកផងដែរថា ការបំផ្ទុះមួយបានកើតឡើងកាលពីថ្ងៃសៅរ៍ នៅលើស្ពានឆ្លងកាត់ច្រកសមុទ្រ Kerch ដែលជាផ្លូវភ្ជាប់ដ៏សំខាន់ សម្រាប់កងកម្លាំងរបស់ទីក្រុងមូស្គូនៅភាគខាងត្បូងអ៊ុយក្រែន ប៉ុន្តែមិនមានការអះអាងថានរណាជាអ្នកទទួលខុសត្រូវនោះឡើយ។ ស្ពាននេះក៏ជាសរសៃឈាមដ៏សំខាន់សម្រាប់កំពង់ផែ Sevastopol ដែលជាកន្លែងដែលកងនាវាចរសមុទ្រខ្មៅរបស់រុស្ស៊ីដាក់មូលដ្ឋាន ក៏ដូចជានិមិត្តសញ្ញាដ៏រឹងមាំនៃការបញ្ចូលឧបទ្វីបគ្រីមៀ ក្នុងឆ្នាំ២០១៤ របស់រុស្ស៊ីផងដែរ៕

អត្ថបទ៖ លីដា
ប្រភព៖ Channel News Asia