យ៉ាងហោចណាស់មានមនុស្ស ២២ នាក់បានស្លាប់ ខណៈដែលជាង ៥០ នាក់កំពុងបាត់ខ្លួន បន្ទាប់ពីការរអិលបាក់ដីនៅកណ្តាលប្រទេសវ៉េណេស៊ុយអេឡា។ ការរអិលបាក់ដីនេះ ត្រូវបានគេរាយការណ៍ថា កើតឡើងបន្ទាប់ពីមានភ្លៀងធ្លាក់ខ្លាំង ដែលបណ្តាលឱ្យទឹកទន្លេជន់លិចហូរហៀរ។ មន្ត្រីម្នាក់បានបញ្ជាក់ថា ប្រធានាធិបតីវេណេស៊ុយអេឡា លោក Nicolas Maduro នឹងប្រកាសតំបន់នោះជា «តំបន់សោកនាដកម្ម» ហើយនឹងប្រកាសកាន់ទុក្ខរយៈពេល ៣ ថ្ងៃ។

ប្រព័ន្ធផ្សព្វផ្សាយក្នុងស្រុកបានរាយការណ៍ថា ស្ថានភាពលំបាកដែលពលរដ្ឋកំពុងជួបប្រទះពេលនេះ បានដាស់ស្មារតីសាមគ្គីភាពរបស់ប្រជាជនវេណេស៊ុយអេឡា ហើយមជ្ឈមណ្ឌលប្រមូលអំណោយជាច្រើនត្រូវបានដំណើរការរួចហើយ នៅក្នុងតំបន់រដ្ឋធានី និងក្នុងរដ្ឋអារ៉ាហ្គា។ ការផ្គត់ផ្គង់សំខាន់ៗដែលស្វែងរកការបរិច្ចាកគឺ ទឹកស្អាត អាហារមិនរលួយ ទំនិញកំប៉ុង សម្លៀកបំពាក់ ស្បែកជើងសម្រាប់កុមារ និងមនុស្សធំ ពូក សន្លឹក និងសម្លៀកបំពាក់៕

អត្ថបទ៖ លីដា
ប្រភព៖ CGTN