ពលរដ្ឋចំនួន ២៦៨នាក់ បានបាត់បង់ជីវិត ខណៈជិត ៦០,០០០ នាក់ ត្រូវជម្លៀសខ្លួន បន្ទាប់ពីគ្រោះរញ្ជួយដីដ៏ខ្លាំងមួយនៅឥណ្ឌូណេស៊ី
- BY
- autoadmin
- November 23, 2022
អាជ្ញាធរឥណ្ឌូណេស៊ីកំពុងតស៊ូ ដើម្បីជួយសង្គ្រោះអ្នកនៅរស់រានមានជីវិត និងផ្តល់ជំនួយដល់ពលរដ្ឋជម្លៀសខ្លួនជិត ៦០,០០០ នាក់ បន្ទាប់ពីគ្រោះរញ្ជួយដីដ៏ខ្លាំងមួយក្នុងកម្រិត ៥.៦រ៉ិចទ័រ បានវាយប្រហារខេត្ត West Java កាលពីថ្ងៃចន្ទ។ អាជ្ញាធរគ្រោះមហន្តរាយបាននិយាយថា យ៉ាងហោចណាស់មនុស្ស ២៦៨ នាក់ ត្រូវបានបញ្ជាក់ថាបានស្លាប់ ហើយ ១៥១ នាក់នៅតែបាត់ខ្លួន ខណៈមនុស្សជាង ១,០០០ នាក់បានរងរបួស។ ក្រុមអ្នកជួយសង្គ្រោះកំពុងព្យាយាមស្វែងរកមនុស្សដែលជាប់នៅក្នុងកំទេចកំទី ដោយសារគ្រោះរញ្ជួយដីនេះបានបណ្តាលឱ្យមានការរអិលបាក់ដីជាច្រើនកន្លែង។
ការរញ្ជួយដីតូចៗជាង ១០០ លើក បានកើតឡើង បន្ទាប់ពីការរញ្ជួយដីដំបូងដែលបង្ខំឱ្យមនុស្សប្រហែល ៥៨,០០០ នាក់ ត្រូវជម្លៀសចេញ។ នៅក្នុងស្រុក Cianjur អ្នកស្រុកប្រហែល ១០០ នាក់ កំពុងប្រើប្រាស់តង់ ដើម្បីសង់ជាកន្លែងស្នាក់បណ្តោះអាសន្ននៅខាងក្រៅ។ អ្នកជម្លៀសជាច្រើននាក់ត្រូវបានគេទុកចោលដោយគ្មានការផ្គត់ផ្គង់ជំនួយជាង ២៤ម៉ោង បន្ទាប់ពីការរញ្ជួយដី។ ប្រព័ន្ធផ្សព្វផ្សាយក្នុងស្រុកនិយាយថា អ្នកជម្លៀសត្រូវការអាហារ ភួយ និងក្រណាត់កន្ទបទារក។ ប៉ុន្តែតំបន់ជាច្រើននៅដាច់ពីគេ ពីព្រោះការរអិលបាក់ដីបានធ្វើឱ្យផ្លូវមួយចំនួនមិនអាចធ្វើដំណើរបានឡើយ។ មន្ត្រីឧតុនិយមបានព្រមានអ្នកស្រុកឱ្យបន្តប្រុងប្រយ័ត្ន ព្រោះភ្លៀងអាចបង្កឱ្យមានការរអិលបាក់ដី និងពង្រីកការខូចខាតបន្ថែមទៀត៕
អត្ថបទ៖ លីដា
ប្រភព៖ NHK
- Share This Post: