សភារបស់ប្រទេសប៉េរូបានបោះឆ្នោតកាលពីថ្ងៃពុធ ដើម្បីបណ្តេញប្រធានាធិបតី Pedro Castillo ចេញពីតំណែង នៅក្នុងសវនាការមួយ លើការចោទប្រកាន់ពីបទពុករលួយ។ លោក Castillo ដែលជាអ្នកឆ្វេងនិយម និងជាអតីតគ្រូបង្រៀនរូបនេះ បានធ្វើការទម្លាក់លោកស្រី Keiko Fujimori ដែលជាកូនស្រីរបស់អតីតប្រធានាធិបតី Alberto Fujimori នៅក្នុងការបោះឆ្នោតប្រធានាធិបតីកាលពីខែមិថុនាឆ្នាំមុន។ ប៉ុន្តែ​ការ​គ្រប់​គ្រង​របស់​លោក​ Castillo មិន​មាន​ស្ថិរភាព​តាំង​ពី​ដើម​មក ខណៈត្រូវប្រឈមនឹងសំឡេងប្រឆាំងជុំវិញការតែងតាំងគណៈរដ្ឋមន្ត្រីថ្មី ដោយសារវាផ្ទុយពីរដ្ឋធម្មនុញ្ញ។

កាល​ពី​ថ្ងៃ​ពុធ លោក Castillo បាន​ប្រកាស​ភ្លាមៗ​ក្នុង​សុន្ទរកថា​តាម​ទូរទស្សន៍​ថា លោក​កំពុងធ្វើការ​រំលាយ​សភា ដំឡើង​រដ្ឋាភិបាល​គ្រាអាសន្ន និង​ដាក់​បម្រាម​គោចរ​ពេល​យប់។ ក្រុមអ្នកសង្កេតការណ៍ជឿថា សកម្មភាពនេះគឺជាការឆ្លើយតបទៅនឹងនីតិវិធីចោទប្រកាន់របស់សភា ដែលគ្រោងនឹងធ្វើឡើងនៅក្នុងសភានៅថ្ងៃដដែលនោះ។ ប៉ុន្តែ​សមាជិក​សភា​បាន​បន្ត​ការ​កាត់ក្តី ហើយ​ជាង​ ២ ​ភាគ​ ៣ ​នៃ​ពួកគេ ​បាន​បោះឆ្នោត​ដក​លោក​ចេញពី​តំណែង។ ឥឡូវនេះ អនុប្រធានាធិបតីលោកស្រី Dina Boluarte បានស្បថចូលកាន់តំណែងជំនួសលោក Castillo ។ អាជ្ញាធរស៊ើបអង្កេតបាននិយាយថា ការប៉ុនប៉ងរបស់លោក Castillo ដើម្បីរំលាយសភា គឺមិនស្របតាមរដ្ឋធម្មនុញ្ញនោះឡើយ។ សារព័ត៌មានក្នុងស្រុករាយការណ៍ថា លោក Castillo ក៏ត្រូវបានអាជ្ញាធរឃាត់ខ្លួនរួចហើយដែរ៕

អត្ថបទ៖ លីដា
ប្រភព៖ NHK