ប្រធានាធិបតីរុស្ស៊ីលោក វ្ល៉ាឌីមៀ ពូទីន បាន​គំរាម​នឹងបំផ្លាញ​ប្រព័ន្ធ​ការពារ​ដែនអាកាស Patriot ដែល​អាមេរិក​គ្រោង​ផ្គត់ផ្គង់​ដល់​អ៊ុយក្រែន។ លោក ពូទីន បានថ្លែងបែបនេះទៅកាន់ប្រព័ន្ធផ្សព្វផ្សាយរុស្ស៊ីនៅវិមានក្រឹមឡាំងកាលពីថ្ងៃព្រហស្បតិ៍ បន្ទាប់ពីប្រធានាធិបតីសហរដ្ឋអាមេរិកលោក ចូ បៃដិន បានសន្យាផ្តល់ប្រព័ន្ធការពារ Patriot ទៅឱ្យអ៊ុយក្រែន ខណៈពេលដែលធ្វើជាម្ចាស់ផ្ទះជាមួយសមភាគីអ៊ុយក្រែនរបស់គាត់ គឺលោក Volodymyr Zelenskyy នៅសេតវិមានកាលពីថ្ងៃពុធ។

លោក ពូទីន បាននិយាយថា ប្រព័ន្ធនេះចាស់ហើយ មិនមានប្រសិទ្ធភាពដូចប្រព័ន្ធមីស៊ីល S-300 ផ្ទាល់របស់រុស្ស៊ីនោះទេ។ លោកបាននិយាយថា ការផ្គត់ផ្គង់ប្រព័ន្ធ Patriot នឹងអូសបន្លាយពេលជម្លោះ ហើយរុស្ស៊ីនឹងបំផ្លាញវា ប្រសិនបើវាត្រូវបានពង្រាយនៅអ៊ុយក្រែន។ លោក ពូទីន ក៏បានលើកឡើងថា នឹងមានផែនការសម្រាប់ឆ្នាំក្រោយ ហើយលើសពីជម្លោះសព្វថ្ងៃ។ គាត់ក៏បានសង្កត់ធ្ងន់ថា វិធានការទាក់ទងនឹងប្រតិបត្តិការយោធាពិសេស គឺពិតជាចាំបាច់សម្រាប់រុស្ស៊ី។

លោក​បាន​ជំរុញឱ្យប្រជាជន​រុស្ស៊ី​អរគុណ​យោធា​របស់​ពួកគេ​ សម្រាប់​ការ​ការពារ​ផលប្រយោជន៍​ជាតិ អធិបតេយ្យភាព និង​ប្រជាជន​របស់ប្រទេស។ លោក ពូទីន ក៏បានអត្ថាធិប្បាយលើការលុបចោលសុន្ទរកថាថ្នាក់រដ្ឋប្រចាំឆ្នាំរបស់លោកនៅដើមឆ្នាំនេះ ដែលសុន្ទរកថានោះ គ្រោងនឹងនិយាយពីគោលនយោបាយក្នុងស្រុក និងការទូត។ គាត់បានពន្យល់ថា គាត់ត្រូវបានគេបង្ខំឱ្យធ្វើដូច្នេះដោយសារតែកាលៈទេសៈផ្លាស់ប្តូរ ហើយបាននិយាយថា គាត់នឹងថ្លែងសុន្ទរកថានៅដើមឆ្នាំក្រោយ។ ការិយាល័យរបស់លោក ពូទីន បាននិយាយថា សន្និសីទសារព័ត៌មានចុងឆ្នាំរបស់គាត់ក៏ត្រូវបានផ្អាកនៅឆ្នាំនេះផងដែរ៕

អត្ថបទ៖ លីដា
ប្រភព៖ The Guardian