យោធាកូរ៉េខាងត្បូងបានចាប់ផ្តើមធ្វើសមយុទ្ធ ដើម្បីពង្រឹងការការពារដែនអាកាសរបស់ខ្លួន បន្ទាប់ពីបរាជ័យក្នុងការស្ទាក់ចាប់យន្តហោះគ្មានមនុស្សបើករបស់កូរ៉េខាងជើង ដែលបានរំលោភលើដែនអាកាសរបស់ខ្លួន។ ការរិះគន់បានកើនមានឡើង បន្ទាប់ពីយោធាកូរ៉េខាងត្បូង បានខកខានក្នុងការស្ទាក់ចាប់យន្តហោះគ្មានមនុស្សបើកចំនួន ៥ គ្រឿង ដែលឆ្លងកាត់បន្ទាត់កំណត់ព្រំដែនយោធារវាងប្រទេសទាំង ២ កាលពីថ្ងៃចន្ទ។ ឧទ្ធម្ភាគចក្រយោធាកូរ៉េខាងត្បូង និងយន្តហោះផ្សេងទៀត បានព្យាយាមបាញ់ទម្លាក់ពួកគេដោយបាញ់ជាង ១០០គ្រាប់ ដោយមិនជោគជ័យ។

កាល​ពី​ថ្ងៃ​ព្រហស្បតិ៍ យោធា​បាន​ធ្វើ​សមយុទ្ធ​ដែល​មាន​ការ​ចូលរួម​ពី​កម្លាំង​ទ័ព​អាកាស និង​កងទ័ពជើងគោក​របស់​ខ្លួន ​នៅ​ជិត​ទីក្រុង​សេអ៊ូល ក្រោម​សេណារីយ៉ូ​សម្មតិកម្ម​នៃ​ការ​ជ្រៀត​ចូល​យន្តហោះ​គ្មានមនុស្សបើក។ អគ្គសេនាធិការចម្រុះបាននិយាយថា យន្តហោះប្រហែល ២០ គ្រឿង រួមទាំងឧទ្ធម្ភាគចក្រវាយប្រហារ ត្រូវបានដាក់ចល័ត ហើយពួកគេបានអនុវត្តការស្វែងរក កំណត់អត្តសញ្ញាណ តាមដាន និងស្ទាក់ចាប់យន្តហោះគ្មានមនុស្សបើក។

យោធា​ក៏បាន​បញ្ចេញ​រូបថត​ដែល​បង្ហាញ​ពី​ទាហាន​ជើងគោក​ដែល​ចូលរួម​ក្នុង​សមយុទ្ធ ដោយបាននិយាយថា ទាហានបានអនុវត្តការស្ទាក់ចាប់យន្តហោះគ្មានមនុស្សបើកជាមួយអាវុធ autocannon និងមីស៊ីលពីដីទៅអាកាស។ ប្រធានាធិបតីកូរ៉េខាងត្បូងលោក Yoon Suk-yeol កាលពីថ្ងៃព្រហស្បតិ៍ បានអំពាវនាវឱ្យមានការដាក់ទណ្ឌកម្ម និងការសងសឹក ប្រឆាំងនឹងអ្វីដែលលោកហៅថា«សកម្មភាពរំលោភលើសេរីភាពរបស់យើង» ហើយ​ថា នេះ​ជា​មធ្យោបាយ​តែ​មួយ​គត់​ក្នុង​ការ​ទប់ស្កាត់​ការ​ញុះញង់៕

អត្ថបទ៖ លីដា
ប្រភព៖ NHK