គ្រួសារមួយនៅវៀតណាមត្រូវបានគេពិន័យ ២,៧០០ដុល្លារ ពីបទចិញ្ចឹមសត្វឆ្កែជាង ៨០ក្បាល ដែលធ្វើឱ្យជះក្លិនមិនល្អដល់អ្នកជិតខាង

វៀតណាម៖ គ្រួសារមួយនៅក្នុងសង្កាត់ទី៤ របស់ទីក្រុងហូជីមិញ ដែលមានចញ្ចឹមសត្វឆ្កែចំនួន ៨២ក្បាល ត្រូវបានអាជ្ញាធរពិន័យជាប្រាក់ ៦៤ លានដុង (២,៧០០ ដុល្លារអាមេរិក) ពីបទបំពុលបរិស្ថាន។ អាជ្ញាធរនៅមណ្ឌលទី៩ បាននិយាយថា ពួកគេបានសម្រេចចិត្តផាកពិន័យគ្រួសារ ដែលរស់នៅលើផ្លូវ Hoang Dieu ចំពោះការបង្ហូរទឹកស្អុយលើសពីចំនួនអនុញ្ញាតរហូតដល់ទៅ ១០ដង។ អាជ្ញាធរក៏បានជួលក្រុមហ៊ុនឯករាជ្យមួយ ដើម្បីប្រមូលសំណាកទឹកស្អុយដែលហូរចេញពីផ្ទះរបស់គ្រូសារនេះ។

ភាគច្រើននៃសត្វឆ្កែដែលកំពុងរស់នៅក្នុងផ្ទះទំហំ ២៦ ម៉ែត្រ​ការេនេះ គឺជាកូនឆ្កែ ឬឆ្កែឈឺដែលត្រូវបានគេបោះបង់ចោល។ អ្នកជិតខាង​បាន​ត្អូញត្អែរ​ម្តង​ហើយ​ម្តងទៀត​ទៅកាន់​អាជ្ញាធរ​ អំពី​ក្លិន សំឡេង និង​ការ​បញ្ចេញ​ទឹកស្អុយ​។ ទន្ទឹមនឹងនេះ គ្រួសារ​នេះ​ធ្លាប់​យក​លាមក​ឆ្កែ​ ​ទៅ​ដាក់​ក្នុងបណ្ដាញលូ​នៅ​មុខ​ផ្ទះ ដែលធ្វើឱ្យជះក្លិនអាក្រក់ទៅអ្នកជិតខាង។ យ៉ាងណាគេ​មិន​ដឹង​ច្បាស់​ថា តើ​អាជ្ញាធរ​មាន​គម្រោង​ផ្លាស់ទី​ឆ្កែ​​ទៅ​ទីជម្រក​សាធារណៈ ​ឬ​អត់​នោះ​ទេ៕

អត្ថបទ៖ លីដា
ប្រភព៖ VNExpress