អតីតប្រធានាធិបតីអាមេរិកលោក ដូណាល់ ត្រាំ ត្រូវបានប៉ូលីសចាប់ខ្លួនជាលើកដំបូងក្នុងជីវិតរបស់គាត់ បន្ទាប់ពីបាន​ប្រគល់​ខ្លួន​ឱ្យ​អាជ្ញាធរ​នៅ​ឯតុលាការ​ព្រហ្មទណ្ឌ Manhattan នៅ​ប្រហែល​ម៉ោង ១ និង ៣០នាទី រសៀលកាល​ពី​ថ្ងៃ​អង្គារ។ យ៉ាងណាក៏ដោយ គាត់ត្រូវបានគេចាប់ខ្លួនប្រមាណ ២ ម៉ោងប៉ុណ្ណោះ ហើយគាត់ត្រូវបានអ្នកសារព័ត៌មានមើលឃើញដើរចេញពីតុលាការ បន្ទាប់ពីបានផ្ដិតមេដៃលើឯកសារពាក់ព័ន្ធមួយចំនួន នេះបើតាមការចុះផ្សាយរបស់សារព័ត៌មាន New York Magazine ។

នៅ​ក្នុង​បន្ទប់​សវនាការ ជន​ជាប់​ចោទ​អាយុ​ ៧៦​ឆ្នាំ​រូបនេះ បាន​អង្គុយ​ដាក់​ដៃ​លើ​ភ្លៅ​ក្បែរ​មេធាវី​ការពារ​ក្តីរបស់គាត់។ នៅពេលសួរដោយចៅក្រមលោក Juan Merchan ពីរបៀបដែលគាត់ជាប់ចោទពីបទឧក្រិដ្ឋចំនួន ៣៤ ករណី នៃការក្លែងបន្លំកំណត់ត្រាអាជីវកម្មរបស់គាត់ លោក ដូណាល់ ត្រាំ បានឆ្លើយថា គាត់គ្មានពិរុទ្ធអ្វីទេ។ ជម្រាបដែរថាលោក ត្រាំ កំពុងរងការ​ចោទ​ប្រកាន់​ព្រហ្មទណ្ឌ​ចំនួន ៣៤ ករណី ប្រឆាំង​នឹង​រូប​លោក​នៅ​តុលាការ​ ហើយនេះគឺជាចោទ​ប្រកាន់​ព្រហ្មទណ្ឌ​​លើក​ដំបូង​បំផុត សម្រាប់​អតីត​ប្រធានាធិបតី​អាមេរិករូបនេះ៕

អត្ថបទ៖ លីដា
ប្រភព៖ New York Magazine