យោងតាមការចុះផ្សាយរបស់សារព័ត៌មាន 9to5mac បានរាយការណ៍ថា Apple បានចុះប៉ាតង់សម្រាប់ប្រអប់ AirPods ប្រភេទ touchscreen ជាមួយនឹងការិយាល័យ US Patent & Trademark របស់សហរដ្ឋអាមេរិក។ នេះមានន័យថា AirPods នឹងមានការរចនា និងមុខងារថ្មីៗជាច្រើន ចាប់តាំងពីកាសគ្មានខ្សែមួយនេះបានបង្ហាញខ្លួននៅឆ្នាំ២០១៦។ អេក្រង់ Display នៅលើប្រអប់ AirPods ដែលបានចុះប៉ាតង់នោះ ក៏នឹងមានមកជាមួយនឹងកម្មវិធីដូចជា៖ ផែនទី អាកាសធាតុ និងការជូនដំណឹង នៅពីលើមុខងារដើមរបស់វាផងដែរ។

យោងតាមគំរូនៅក្នុងប៉ាតង់បានឱ្យដឹងថា អ្នកប្រើប្រាស់នឹងអាចផ្លាស់ប្ដូរកម្មវិធី (apps) ដោយការបញ្ជាទៅ Siri ហើយវាក៏ទំនងអាចផ្ទេរបទចម្រៀងពី AirPods ទៅ HomePod ដោយប្រើ Handoff ទៀតផង។ ប៉ាតង់​នេះ​ត្រូវ​បាន​ដាក់​ជូន​ដោយ Apple ក្នុង​ខែ​កញ្ញា ឆ្នាំ២០២២ ដែល​បង្ហាញ​ថា ​ក្រុមហ៊ុនបានផ្ដោតយ៉ាងខ្លាំងលើគំនិតរចនានេះ។ ជា​ការ​ពិត​ណាស់ Apple បាន​ដាក់​ឯកសារ​ប៉ាតង់​ជា​ច្រើន ប៉ុន្តែ​មាន​តែ​មួយ​ចំនួន​ប៉ុណ្ណោះ ​ដែល​ត្រូវ​បាន​ប្រើ​ជាក់ស្ដែងលើឧបករណ៍​របស់ពួកគេ។ ប៉ុន្តែទោះយ៉ាងណាក៏ដោយ វាគួរឱ្យចាប់អារម្មណ៍ក្នុងការស្រមៃថា AirPods ដំណើរការប្រព័ន្ធប្រតិបត្តិការដែលមានមូលដ្ឋានលើ UI ជាមួយនឹងអេក្រង់ touchscreen ៕

អត្ថបទ៖ លីដា
ប្រភព៖ 9to5mac