នាយករដ្ឋមន្ត្រីអ៊ុយក្រែន លោក Denys Shmyhal បានស្នើឱ្យសហរដ្ឋអាមេរិក ផ្តល់យន្តហោះចម្បាំង F-15 និង F-16 សម្រាប់ធ្វើសង្គ្រាមប្រឆាំងនឹងរុស្ស៊ី។ លោក Shmyhal បានជួបជាមួយរដ្ឋមន្ត្រីការពារជាតិអាមេរិក Lloyd Austin នៅមន្ទីរបញ្ចកោណកាលពីថ្ងៃពុធ។ ស្របពេលដែលលោក Austin បាននិយាយថា៖«យើងនឹងបន្តផ្តល់ជំនួយផ្នែកសន្តិសុខយ៉ាងឆាប់រហ័សតាមរយៈលទ្ធកម្ម និងពីភាគហ៊ុនរបស់យើងផ្ទាល់ផងដែរ»។

លោក Austin បាននិយាយផងដែរថា៖«ខ្ញុំមានទំនុកចិត្តថា យើងនឹងបំពេញតម្រូវការការពារជាតិរបស់អ៊ុយក្រែននៅនិទាឃរដូវ និងលើសពីនេះ»។

លោក Shmyhal បានថ្លែងអំណរគុណដល់សហរដ្ឋអាមេរិកសម្រាប់ ការគាំទ្រផ្នែកយោធាប្រកបដោយស្ថិរភាព និងជាបន្តបន្ទាប់ ហើយបាននិយាយថា៖«យើងនឹងឈ្នះសង្រ្គាមនេះ។ ប៉ុន្តែដើម្បីសម្រេចបានវាលឿនជាងមុន និងដោយមានអ្នកស្លាប់តិចជាងនេះ អ៊ុយក្រែននៅតែត្រូវការការគាំទ្រផ្នែកយោធាយ៉ាងយកចិត្តទុកដាក់»។ បន្ទាប់​មក លោក​បាន​អំពាវនាវ​ឱ្យ​អាមេរិក​ផ្គត់ផ្គង់​យន្តហោះ​ចម្បាំង ព្រម​ទាំង​មីស៊ីលរយៈ​ចម្ងាយ​ឆ្ងាយ។ ប៉ុន្តែរហូត​មក​ដល់​ពេល​នេះ រដ្ឋាភិបាល​ក្រុង​វ៉ាស៊ីនតោន​មិន​ទាន់​យល់​ព្រម​ផ្តល់​ឱ្យ​អ៊ុយក្រែន​នៅឡើយទេ៕

អត្ថបទ៖ លីដា
ប្រភព៖ NHK