រដ្ឋមន្ត្រីប្រទេស G7 គ្រោងនឹងពិភាក្សាគ្នាអំពីការលើកកម្ពស់ និងហានិភ័យរបស់ AI ជាពិសេស ChatGPT

រដ្ឋមន្ត្រីមកពីប្រទេសទាំងប្រាំពីរ (G7) គ្រោងនឹងពិភាក្សាគ្នាអំពីរបៀបដែលល្អបំផុត នៅក្នុងការលើកកម្ពស់ AI នៅពេលពួកគេនឹងជួបគ្នានៅប្រទេសជប៉ុននៅចុងសប្តាហ៍នេះ។ វាបានកើតឡើងនៅពេលដែលប្រជាប្រិយភាពនៃកម្មវិធីដូចជា ChatGPT ចាប់ផ្តើមមានសន្ទុះកាន់តែខ្លាំងឡើង ក៏ដូចជាការជជែកពិភាក្សាកាន់តែខ្លាំងពាក់ព័ន្ធនឹងការផ្លាស់ប្តូរទិន្នន័យដោយសេរីរបស់វា។ រដ្ឋមន្ត្រីប្រទេស G7 សម្រាប់ឌីជីថលនីយកម្ម និងបច្ចេកវិទ្យា នឹងត្រូវជួបប្រជុំគ្នានៅថ្ងៃសៅរ៍នៅទីក្រុង Takasaki ភាគខាងជើងនៃទីក្រុងតូក្យូ។

សេចក្តីថ្លែងការរួមមួយដែលទទួលបានដោយ NHK បាននិយាយថា ការរីកចម្រើនយ៉ាងឆាប់រហ័សរបស់ AI កំពុងមានផលប៉ះពាល់យ៉ាងខ្លាំងដល់សង្គម ដោយព្រមានថា AI អាចបង្កើតអត្ថបទ និងរូបភាព ជាមួយនឹងព័ត៌មានមិនពិត។

វាបានបន្ថែមថា បញ្ហាប្រឈម និងផលប៉ះពាល់នៃ AI ចាំបាច់ត្រូវសិក្សាដោយក្រុមអន្តរជាតិ ដូចជាអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ចជាដើម។ ក្រុមរដ្ឋមន្ត្រីនឹងមានបំណងចងក្រងគោលការណ៍ណែនាំ សម្រាប់ការប្រើប្រាស់ AI ឱ្យបានត្រឹមត្រូវ ដូច្នេះវានឹងអាចជឿទុកចិត្តបាន។ សេចក្តីថ្លែងការណ៍បានកត់សម្គាល់ថា ប្រទេសផ្សេងៗគ្នាមានច្បាប់ផ្សេងៗគ្នា ដែលបង្ហាញពីឧបសគ្គដល់អាជីវកម្មក្នុងការប្រើប្រាស់ទិន្នន័យឆ្លងព្រំដែន។ វានិយាយថា រដ្ឋមន្ត្រីនឹងព្យាយាមពង្រឹងក្របខណ្ឌមួយដើម្បីជួយបង្កើតច្បាប់អន្តរជាតិ៕

អត្ថបទ៖ លីដា
ប្រភព៖ NHK