ករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងដោយបុរសម្នាក់ បើករថយន្តម៉ាក Lexus 300 បើកបរក្នុងល្បឿនលឿនហើយទៅបុកហ្វូងមនុស្សដែលកំពុងអង្គុយផឹកស៊ី នៅតាមផ្លូវ បណ្តាលអោយមានអ្នកស្លាប់៣និងរបួសជាច្រើននាក់  ស្ថិតនៅក្រោយអធិការនគរបាលខណ្ឌទួលគោកភូមិ៤​ សង្កាត់បឹងសាឡាង ខណ្ឌទួលគោក រាជធានីភ្នំពេញ។ យ៉ាងណាមិញកាលពីពេលថ្មីៗនេះ ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បាននាំយកអំណោយនិងសួរសុខទុក្ខជនរងគ្រោះដែលរងរបួស ព្រមទាំងក្មេងកំព្រា២នាក់ ដែលម្តាយបានស្លាប់នៅក្នុងហេតុការណ៍។

ឯកឧត្តម ឧត្តមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ បានសរសេររៀបរាប់ថា៖ “ដោយក្តីអាណិតអាសូរចំពោះជនរងគ្រោះដែលបានស្លាប់​ និងរបួសធ្ងន់និងស្រាល៦នាក់នៅក្នុងហេតុការណ៍គ្រោះថ្នាក់ចរាចរណ៍បុករះនៅសង្កាត់បឹងសាឡាង​ ខណ្ឌទួលគោក​ ខ្ញុំបានឆ្លៀតពេលបាយថ្ងៃត្រង់នាំយកអំណោយមួយចំនួនធំអោយកូនកំព្រា២នាក់ដែលម្តាយបានបាត់បង់ជីវិតក្នុងហេតុការណ៍នោះ​ហេីយក៏ឧបត្ថម្ភដល់ជនរងគ្រោះផ្សេងទៀតផងដែរ។ ពលរដ្ឋដែលរងគ្រោះទាំងនោះ​ បានថ្លែងអំណរដល់កងកម្លាំងដែលបានចាប់ជនបង្កយកទៅផ្តន្ទាទោសទាន់ពេលវេលា​។ ស្របពេលនោះ​ ខ្ញុំក៏បានផ្តល់ថវិកា​ និងគ្រឿងឧបភោគមួយចំនួនដល់អធិការរងខណ្ឌទួលគោក​ លោកវរសេនីយ៍ទោ​ តី​ សុវណ្ណារ៉េតដែលជួបគ្រោះថ្នាក់ចរាចរណ៍ក្នុងពេលបំពេញភារកិច្ច”៕

អត្ថបទ៖ ណារ៉ែន