សម្តេចកិត្តិព្រឹទ្ធបណ្ឌិត ចុះសួរសុខទុក្ខ លោកជំទាវ ផ្លេក ភិរុណ អតីតប្រធានកាកបាទក្រហមកម្ពុជា ដែលកំពុងសម្រាកថែទាំសុខភាពនៅមន្ទីរពេទ្យ
នៅរសៀលថ្ងៃអាទិត្យ ២កេីត ខែពិសាខ ឆ្នាំកុរ ឯកស័ក ព.ស.២៥៦២ ត្រូវនឹងថ្ងៃទី ៥ ខែឧសភា ឆ្នាំ២០១៩ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងថ្នាក់ដឹកនាំកាកបាទក្រហមកម្ពុជា បានអញ្ជេីញចុះសួរសុខទុក្ខ លោកជំទាវ ផ្លេក ភិរុណ ដែលមានជន្មាយុ ៩៩ឆ្នាំ (អតីតប្រធានកាកបាទក្រហមកម្ពុជាពីឆ្នាំ ១៩៧៤-១៩៧៥ និងពីឆ្នាំ ១៩៧៩-១៩៩២) កំពុងសម្រាកថែទាំសុខភាពនៅមន្ទីរពេទ្យកាល់ម៉ែត។
ក្នុងឱកាសនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានពាំនាំមកជាមួយនូវព្រះរាជទានសេចក្ដីនឹករលឹក និងព្រះរាជឱង្កាផ្ញើសួរសុខទុក្ខអំពី ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រនៃព្រះរាជាណាចក្រកម្ពុជា និង សម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា និងសម្តេចតេជោ ហ៊ុន សែន នាយករដ្ឋមន្ត្រី ដែលមានព្រះរាជហឫទ័យ និងទឹកចិត្តស្រឡាញ់ដ៏ជ្រាលជ្រៅបំផុតចំពោះលោកជំទាវ ផ្លេក ភិរុណ ដែលជាបុព្វការីជន ធ្លាប់បានលះបង់កម្លាំងកាយ-ចិត្តបម្រើការងារមនុស្សធម៌ជាមួយកាកបាទក្រហមកម្ពុជា ចាប់តាំងពីថ្ងៃដែលកាកបាទក្រហមកម្ពុជា ចាប់បដិសន្ធិក្នុងឆ្នាំ ១៩៥៥ និងសូមបួងសួងជូនលោកជំទាវ មានជន្មាយុយឺនយូរជាងរយឆ្នាំដេីម្បីជាម្លប់ដ៏ត្រជាក់ដល់កូន ចៅជំនាន់ក្រោយ៕
ប្រភព៖ Cabinet of Samdech Bun Rany HUNSEN
ដោយ៖ ណារ៉ែន