ពិធីសម្ពោធសាលាភាពជាអ្នកដឹកនាំនៃមូលនិធិ CIESF ត្រូវបានប្រារព្ធធ្វើឡើងនៅថ្ងៃទី៦ ខែមិថុនា ក្រោមវត្តមានដ៏ខ្ពង់ខ្ពស់របស់ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្រ្តីក្រសួងអប់រំយុវជននិងកីឡា។ ឯកឧត្តមបណ្ឌិតសភាចារ្យ ហង់ ជួនណារ៉ុន និង ឯកឧត្តម ហូរីណូអ៊ុជិ ហ៊ីដេហ៊ីសា ឯកអគ្គរាជទូតជប៉ុនប្រចាំប្រទេសកម្ពុជា បានចូលរួមអបអរសារទរពិធីសម្ពោធនេះ។

សាលាភាពជាអ្នកដឹកនាំនៃមូលនិធិ CIESF ស្ថិតនៅក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ អ្វីដែលគួរឲ្យរំភើបនោះគឺការចូលរៀននៅសាលានេះមិនតម្រូវឲ្យបង់ប្រាក់ឡើយ។ សាលាភាពជាអ្នកដឹកនាំរបស់មូលនិធិស៊ីសេហ្វ CIESF គឺជាសាលារៀនគំរូមួយដែលមានស្ដង់ដារសិក្សាបែបប្រទេសជប៉ុន បណ្ដុះបណ្ដាលសិស្សចាប់ពីថ្នាក់មតេយ្យ រហូតដល់អនុវិទ្យាល័យ ដោយផ្ដោតលើចំណេះដឹង បញ្ញាស្មារតី ជំនាញ ដែលនាំឲ្យក្មេងៗក្លាយជាទំពាំងស្នងឬស្សីដ៏ល្អ និងក្លាយជាអ្នកដឹកនាំដ៏ប្រសើរក្នុងថ្ងៃអនាគត។

CIESF គឺជាអង្គការក្រៅរដ្ឋាភិបាលជប៉ុនមួយដែលផ្តោតទៅលើការអភិវឌ្ឍធនធានមនុស្សនៅក្នុងប្រទេសកម្ពុជា។ CIESF ផ្តល់ឲ្យយុវជនកម្ពុជានូវបរិយាកាសល្អសម្រាប់ការសិក្សារបស់ពួកគេ។ សិស្សានុសិស្សនៅសាលានេះរីករាយណាស់ដែលអាចរៀនសូត្របានច្រើននៅក្នុងបរិយាកាសប្រកបដោយសុវត្ថិភាពនិងផាសុកភាព៕

ប្រភព​៖ ស្ថានទូតជប៉ុននៅកម្ពុជា

ដោយ៖ ណារ៉ែន