ចង់ជិះរថយន្តក្រុងឥតគិតថ្លៃទៅស្រុកកំណើត កុំភ្លេចមកទីតាំងទាំង៣កន្លែងនេះ

កាលពីម្សិលមិញនេះ សម្តេចតេជោ ហ៊ុន សែន បានធ្វើការប្រកាសជាសាធារណៈថា ចាប់ពីថ្ងៃទី១២ ខែមេសា ដល់ថ្ងៃទី១៨ ខែមេសា ឆ្នាំ ២០១៨ នេះ គឺបងប្អូនប្រជាពលរដ្ឋអាចជិះរថយន្តក្រុងដោយមិនបង់លុយនៅក្នុងរាជធានីភ្នំពេញ និងពីភ្នំពេញទៅតាមបណ្តាខេត្តតាមផ្លូវជាតិលេខ ៥ (ភ្នំពេញ ទៅ កំពង់ឆ្នាំង ពោធិសាត់ បាត់ដំបង បន្ទាយមានជ័យ) និងផ្លូវជាតិលេខ ១ (ភ្នំពេញ ទៅ កណ្តាល ព្រៃវែង ស្វាយរៀង)។

ទីតាំងទាំង៣កន្លែង ដែលរដ្ឋបាលរាជធានីភ្នំពេញរៀបចំសម្រាប់រថយន្តក្រុងចេញដំណើរមានដូចជា៖

ទី១៖ នៅមហាវិធី សម្តេចអគ្គមហាសេនាបតីតេជោ ហ៊ុន សែន (ផ្លូវ៦០ម៉ែត្រ) ទល់មុខក្រុមហ៊ុន ម៉ែកស៊ីដែស បិន (Mercedes Benz) ដោយចូលតាមផ្លូវមុខវត្តចាក់អង្រែក្រោម ចំងាយប្រមាណ៧០០ម៉ែត្រ ឬចូលតាមមហាវិថីព្រះមុនីវង្ស ទៅផ្លូវ៦០ម៉ែត្រប្រមាណ១.៥០០ម៉ែត្រ សម្រាប់បងប្អូនប្រជាពលរដ្ឋ ដែលត្រូវធ្វើដំណើរតាមផ្លូវជាតិលេខ១ឆ្ពោះទៅខេត្តកណ្តាល ព្រៃវែង និងខេត្តស្វាយរៀង

ទី២៖ នៅចំណតសួនឬស្សីកែវ (ទីលានប្រជាធិបតេយ្យថ្មី) ផ្លូវជាតិលេខ៥ សង្កាត់ឬស្សីកែវ ខណ្ឌឬស្សីកែវ សម្រាប់បងប្អូនប្រជាពលរដ្ឋ ដែលត្រូវធ្វើដំណើរតាមផ្លូវជាតិលេខ៥ ឆ្ពោះទៅខេត្តកំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ

ទី៣៖ នៅចំណុចប្រសព្វរវាងផ្លូវជាតិលេខ៤ និងមហាវិថីឈ្នះឈ្នះ (កប់ស្រូវ) សង្កាត់ចោមចៅ ខណ្ឌពោធិ៍សែនជ័យ សម្រាប់បងប្អូនប្រជាពលរដ្ឋ ដែលត្រូវធ្វើដំណើរតាមផ្លូវជាតិលេខ៥ ឆ្ពោះទៅខេត្តកំពង់ឆ្នាំង ពោធិ៍សាត់ បាត់ដំបង និងខេត្តបន្ទាយមានជ័យ៕

អត្ថបទ៖ សេម