សូមបង្កើនការប្រុងប្រយ័ត្ន! អ្នកទេសចរអង់គ្លេសម្នាក់ត្រូវបានគេសង្ស័យថា មានជំងឺរលាកសួតដែលកំពុងរាតត្បាតក្នុងប្រទេសចិន

ថ្មីៗនេះមានជនបរទេសម្នាក់ត្រូវបានគេសង្ស័យថា ទំនងជាឆ្លងជំងឺរលាកសួត ដែលចេញពីក្រុមវីរុសថ្មី coronavirus នៅពេលដែលគាត់ចូលមកកម្សាន្តក្នុងប្រទេសថៃ។ អ្នកទេសចរជនជាតិអង់គ្លេសឈ្មោះ Ash Shorley អាយុ ៣២ឆ្នាំ មកពីទីក្រុង Thornton, Lancashire ហើយលោកគឺជាជនរងគ្រោះលោកខាងលិចដំបូងបង្អស់ ដែលត្រូវបានគេសង្ស័យថាបានឆ្លងជំងឺនេះ ប៉ុន្តែយ៉ាងណាខាងរដ្ឋាភិបាលថៃនៅមិនទាន់បញ្ជាក់នៅឡើយ។ លោកត្រូវបានគេឱ្យដឹងថា បានកំពុងទៅលេងកោះ Koh Phi Phi ដ៏ល្បីល្បាញរបស់ថៃ ប៉ុន្តែនៅអំឡុងពេលកម្សាន្តគាត់ស្រាប់តែចាប់ផ្ដើមមានអារម្មណ៍ថាមិនស្រួលខ្លួន។

ក្រោយមកគាត់ក៏បង្ហាញរោគសញ្ញាដូចជាមានជំងឺផ្តាសាយ ហើយស្ថានភាពរបស់គាត់កាន់តែយ៉ាប់យ៉ឺនយ៉ាងឆាប់រហ័ស។ គ្រូពេទ្យនៅលើកោះនោះមិនអាចផ្តល់ការថែទាំត្រឹមត្រូវដល់លោក Ash Shorley បានទេ ដូច្នេះគាត់ត្រូវដឹកចេញពីកោះទៅដីគោកវិញ។ ប្រភព Globe Newspaper Bangkok បាននិយាយថា សួតរបស់លោកស្ថិតក្នុងស្ថានភាពធ្ងន់ធ្ងរ ដែលពួកគេត្រូវជួលយន្តហោះដើម្បីបញ្ជូនគាត់ចេញពីកោះ Koh Phi Phi ទៅភូកេត។ ក្រុមគ្រូពេទ្យនៅមន្ទីរពេទ្យនៅភូកេតមិនទាន់អាចបញ្ជាក់ថា លោក Ash Shorley ឆ្លងវីរុសអ្វីនោះទេ ប៉ុន្តែយ៉ាងណាស្ថានភាពរបស់គាត់ គឺស្របពេលដែលប្រទេសថៃក៏មានអ្នកជំងឺរលាកសួតដែលឆ្លងពីចិនដែរ។

ពេលនេះលោក Ash Shorley នៅមិនទាន់ជានៅឡើយ និងថែមទាំងត្រូវការថវិកាបន្ថែមផងដែរ ដោយសារធានារ៉ាប់រងសុខភាពរបស់គាត់មិនអាចជួយផ្គត់ផ្គង់ស្ថានភាពធ្ងន់ធ្ងររបស់គាត់បាននោះទេ។ សម្រាប់អ្នកដែលចង់ជួយគាត់អាចបរិច្ចាគតាមរយៈ GoFundMe បាន ហើយយើងសង្ឃឹមថាគាត់នឹងឆាប់ជា៕

អត្ថបទ៖ លីដា