លោកជំទាវ ហ៊ុន ស៊ីណាត ប្រតិកម្មខ្លាំង ចំពោះការកំណត់ល្បឿន 40km/h នៅលើផ្លូវ 60ម៉ែត្រ រហូតមានប្រសាសន៍បែបនេះ
សង្គម October 10, 2020 Khmernote Media

ក្រោយពេលមន្ទីរសាធារណការនិងដឹកជញ្ជូនរាជធានីភ្នំពេញ បានចុះទៅដាក់ស្លាកសញ្ញាកំណត់ល្បឿននៅលើដងមហាវិថី សម្តេចអគ្គមហាសេនាបតីតេជោ ហ៊ុន សែន រឺផ្លូវ 60ម៉ែត្រ រួចមកក៏មានការប្រតិកម្មពីសំណាក់មហាជនមួយចំនួន ហើយក្នុងនោះលោកជំទាវ ហ៊ុន ស៊ីណាត ក៏បានបង្ហាញប្រតិកម្មរបស់ខ្លួនខ្លាំងៗរហូតប្រើពាក្យធ្ងន់ៗថា៖

“របររកសុីលោកប៉ូលិសខ្លាំងមែន។ សួរមតិមហាជនទៅលោកអ្នកដេកនឹកកំណត់ច្បាប់ ។ មានមនុស្សប៉ុន្មាននាក់ដែលគាំទ្រ ល្បឿន 30/ 40 របស់អស់លោក? មិនមែនសម័យ79 ជិះរទេះគោទេណាអស់លោក? បើមុខសាលារៀនវាមិនអីទេ!! ហើយខ្ញុំនិយាយនេះកុំចោតថាបក្សប្រឆាំង ខ្ញុំមើលឃើញអស់លោកប៉ូលិសធំៗវិញចេញដំណើរឡានបើកផ្ដាច់ព្រលឹងម៉េចមិនគោរពអាល្បឿនដែលដាក់ឲ្យរាស្ត្រ30/40ផងទៅ។”

គួរបញ្ជាក់ផងដែរថា ការកំណត់ល្បឿនការបើកបរនៅលើដងមហាវិថីខាងលើ មន្ទីរសាធារណការ និងដឹកជញ្ជូនរាជធានីភ្នំពេញ ក៏បានបញ្ជាក់ច្បាស់ៗថា៖ “ដោយប្រឈមបញ្ហាគ្រោះថ្នាក់ចរាចរកើតមានជាញឹកញាប់ដោយការបើកបរលឿន លើដងមហាវិថី សម្តេចអគ្គមហាសេនាបតីតេជោ ហ៊ុន សែន ចាប់ពីផ្លូវលេខ ២៧១ ដល់ផ្លូវជាតិលេខ ២ ចាប់ពីពេលនេះតទៅ មហាវិថីនេះត្រូវបានកំណត់ល្បឿនយានយន្តបើកបរមិនអោយលើស ៤០គ.មក្នុង១ម៉ោង។”