កាន់តែស្តែង ! វិដេអូថ្មីមួយទៀត បង្ហាញពីសកម្មភាព រថយន្ត NX200T បុកគេហើយ ថយមកកិនបន្ថែមទៀត
- October 19, 2020
កាលពីពេលថ្មីៗនេះ ប្រិយមិត្តប្រាកដជាបានដឹងពីករណីម្ចាស់រថយន្ត NX 200T ពណ៌ខ្មៅមួយគ្រឿងដែលបើកបរដោយបុរសជាពេទ្យធ្មេញម្នាក់ដេញបុកបុរស២នាក់ជិះម៉ូតូមួយគ្រឿងបណ្តាលអោយស្លាប់ម្នាក់ និងរបួសធ្ងន់ម្នាក់ ត្រូវបានស្នងការដ្ឋាននគរបាលរាជធានីភ្នំពេញ បញ្ជូនសំណុំរឿងទៅកាន់តុលាការដើម្បីចាត់ការតាមផ្លូវច្បាប់។ ស្រាប់តែថ្មីៗនេះ មានគេទម្លាយវិដេអូថ្មីមួយប្លង់ទៀត បង្ហាញពីសកម្មភាពស្តែងៗ ពេលដែលជនរងគ្រោះត្រូវរថយន្ត បុកហោះទៅខ្ទប់នឹងផ្ទះរបស់គេ ហើយត្រូវរថយន្តថយមកកិនបន្ថែមទៀត។ ខាងក្រោមនេះគឺជាវិដេអូប្លង់ថ្មី និងព័ត៌មានលំអិតពីស្នងការដ្ឋាននគរបាលរាជធានីភ្នំពេញ។
គួរបញ្ជាក់ថា តាមការចុះផ្សាយរបស់ ស្នងការដ្ឋាននគរបាលរាជធានីភ្នំពេញ បានបញ្ជាក់ថា កាលពីថ្ងៃទី១៥ ខែតុលា ឆ្នាំ២០២០ វេលាម៉ោង២៣និង៣០នាទីយប់ នៅចំណុច ផ្លូវ១៧៣ ប្រសព្វផ្លូវ៣២៨ ស្ថិតក្នុងសង្កាត់ទួលស្វាយព្រៃទី១ ខណ្ឌបឹងកេងកង មានករណីគ្រោះថ្នាក់ចរាចរណ៍មួយកើតឡើង រវាងរថយន្តម៉ាក Lexus NX 200T ពណ៌ខ្មៅ ពាក់ផ្លាកលេខភ្នំពេញ 2BH-8494 ជាមួយម៉ូតូម៉ាក Honda C125 ពណ៌ខ្មៅ ពាក់ផ្លាកលេខ កណ្តាល 1AI-3848 ។
រថយន្ត Lexus 200T បានបេីកបរតាមបណ្តោយផ្លូវ១៧៣ ទិសដៅពីជេីងទៅត្បូង ដល់កន្លែងកេីតបានបុកម៉ូតូពីក្រោយ រួចបេីកថយកិនបន្ថែមទៀត បណ្តាលឲ្យអ្នកបេីកម៉ូតូស្លាប់នៅកន្លែងកេីតហេតុ និង អ្នករួមដំណេីរម៉ូតូ របួសធ្ងន់។ អ្នកបេីកបររថយន្តបង្កមានឈ្មោះ យ៉ាន់ណា លីណា ភេទប្រុស អាយុ ៣០ឆ្នាំ ជនជាតិខ្មែរ មុខរបរពេទ្យធ្មេញ (ឃាត់ខ្លួនបណ្តោះអាសន្ន) ស្នាក់នៅផ្ទះលេខ៥អឹម ក្រុមទី៤ ភូមិព្រៃព្រីងខាងត្បូងទី១ សង្កាត់ចោមចៅទី២ ខណ្ឌពោធិ៍សែនជ័យ។
ភាភីម៉ូតូជាជនរងគ្រោះបេីកបរដោយឈ្មោះ ខុន តុង ភេទប្រុស អាយុ១៩ឆ្នាំ មុខរបរកម្មករសំណង់ ស្នាក់នៅផ្លូវបេតុង ភូមិ០១ សង្កាត់ស្ទឹងមានជ័យ១ ខណ្ឌមានជ័យ (ស្លាប់) និងអ្នករួមដំណេីរឈ្មោះ ពៅ ម៉ត់ ភេទប្រុស អាយុ ១៧ឆ្នាំ មុខរបររត់កង់បី ស្នាក់នៅភូមិស្រះកែវ សង្កាត់ក្រាំងស្វាយ ស្រុកព្រះស្តេច ខេត្តព្រៃវែង ( របួសធ្ងន់ ) ៕
- Share This Post: