រថយន្តTOYOTA PRUIS បើកឆ្លងកាត់ផ្លូវបំបែកជាបួន ខ្វះការប្រុងប្រយ័ត្ន ក៏ជ្រុលទៅបុករថយន្ត CAMRY រួចខ្ទាតទៅប៉ះម៉ូតូ បណ្ដាលឲ្យម្ចាស់ម៉ូតូរបួសធ្ងន់២នាក់ ដឹកទៅមន្ទីរពេទ្យភ្លាមៗ
រាជធានីភ្នំពេញ៖ ករណីគ្រោះថ្នាក់ចរាចរណ៍មួយកើតឡើងដោយរថយន្តម៉ាកTOYOTA PRUIS បើកឆ្លងកាត់ផ្លូវបំបែកជាបួន ខ្វះការប្រុងប្រយ័ត្ន ក៏ជ្រុលទៅបុករថយន្ត CAMRY HYBRID រួចក៏បានខ្ទាតទៅប៉ះម៉ូតូមួយគ្រឿងទៀតម៉ាក HONDA WAVE បណ្តាលឲ្យម្ចាស់ម៉ូតូរងរបួសធ្ងន់ចំនួន២នាក់ ត្រូវបានបញ្ជូនតាមរថយន្តគិលានសង្គ្រោះគ្លីនិកឯកជនដឹកយកទៅសង្គ្រោះភ្លាមៗ ។ ហេតុការណ៍គ្រោះថ្នាក់ចរាចរណ៍នេះ កើតឡើងកាលពីវេលាម៉ោង០០៖០៥នាទីយប់រំលងអាធ្រាត្រ ឈានចូលថ្ងៃទី១១ ខែកុម្ភៈ ឆ្នាំ២០២១នេះ ស្ថិតតាមបណ្ដោយផ្លូវលេខ៤៣២ កែង១៥៥ ជាប់របងសាលាទួលទំពូង ស្ថិតក្នុងសង្កាត់ ទូលទំពូង១ ខណ្ឌចំការមន រាជធានីភ្នំពេញ។
តាមប្រភព ព័ត៌មានពីកន្លែងកើតហេតុ បានប្រាប់ឲ្យក្រុមការងារខ្មែរណូតដឹងថា មុនពេលកើតហេតុគេបានឃើញរថយន្តមួយគ្រឿង ម៉ាកតូយូតាព្រូស (TOYOTA PRUS) ពណ៌កាប់ស្ទាំង ពាក់ស្លាកលេខភ្នំពេញ 2BE-2919 ធ្វើដំណើរតាមបណ្តោយផ្លូវ៤៣២ ទិសដៅ ពីត្បូងទៅជើង បើកបរក្នុងល្បឿនលឿន លុះមកដល់ចំណុចកើតហេតុ ក៏បានទៅបុករថយន្តមួយគ្រឿង ម៉ាកកាម៉ារីហាយប្រ៊ីត (CAMRY Hybrid) ពណ៌ស ពាក់ស្លាកលេខភ្នំពេញ2AW-7082 ធ្វើដំណើរតាមបណ្តោយផ្លូវ១៥៥ កែងផ្លូវ៤៣២ ទិសដៅពីកើតទៅលិច ភ្លាមៗនោះផងដែររថយន្តក៏បានខ្ទាតទៅប៉ះនិងម៉ូតូមួយគ្រឿងទៀតម៉ាក HONDA-WAVE ពណ៌ស ស្លាកលេខភ្នំពេញ 1CO-6900 បើកបរ ដោយប្តីប្រពន្ធនិងកូនតូចបណ្តាលឲ្យបុរសជាប្តីនិងកូនអាយុ២ឆ្នាំ រងរបួសធ្ងន់ត្រូវបានរថយន្តសាមុយសុងការណ៍ ដឹកទៅសង្រ្គោះបន្ទាន់ភ្លាមៗ។ ចំណែកឯរថយន្តម៉ាកTOYOTA PRUS រងការខូចខាតចំផ្នែកខាងមុខយ៉ាងដំណំ និងបាក់ក្រឡេកង់ខាងស្តាំផងដែរ រីឯរថយន្ត CAMRY HYBRID វិញរងការខូចខាតផ្នែកខាងក្រោយចំហៀងខាងឆ្វេងយ៉ាងដំណំ។ ភ្លាមៗនោះកម្លាំងសមត្ថកិច្ចមូលដ្ឋានបានចុះមកមើលកន្លែងកើតហេតុ រួចទាក់ទងទៅផ្នែកវាស់វែងចរាចរណ៍ខណ្ឌចំការមន ចុះមកពិនិត្យមើលជាក់ស្ដែងសិនផងដែរ តែដោយសារភាគីខាងជនរងគ្រោះត្រូវបានបញ្ជូនទៅសង្គ្រោះនៅឯមន្ទីរពេទ្យ និងចរចាមិនត្រូវគ្នា ទើបសមត្ថកិច្ចទាក់ទងជំនាញចុះមកវាស់វែងតែម្ដង។
បច្ចុប្បន្នក្រោយពេលកើតហេតុសមត្ថកិច្ចមូលដ្ឋានប៉ុស្តិ៍ និងផ្នែកវាស់វែង បានប្រគល់ឲ្យសមត្ថកិច្ចជំនាញចុះមកធ្វើការវាស់វែងនិង យករថយន្តទាំងពីរគ្រឿងនិងម៉ូតូ ទៅរក្សាទុកបណ្ដោះអាសន្ន នៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញ ដើម្បីរងចាំដោះស្រាយគ្នានៅពេលក្រោយ ៕
ដោយ៖ បងម៉េង ខ្មែរណូត