កុំចេះតែហ៊ាន Like ផ្តេសផ្តាស! ថ្ងៃ Valentine ប្រពន្ធព្រីនរូបស្រីស្អាតៗដែលប្តីបានចុច Like ក្នុង Instagram ធ្វើជាកាដូឲ្យប្តី (មានវីដេអូ)

តាមធម្មតានៅក្នុងថ្ងៃទិវានៃសេចក្តីស្រលាញ់ ១៤ កុម្ភៈ គូស្នេហ៍ភាគច្រើនតែងជូនផ្កា ឬអំណោយផ្សេងៗឲ្យគ្នាទៅវិញទៅមកដើម្បីបង្ហាញនូវសេចក្តីស្រលាញ់របស់ពួកគេ។ យ៉ាងណាក្តី មានស្រ្តីជាប្រពន្ធម្នាក់បានជូនកាដូយ៉ាងចម្លែកបំផុតទៅកាន់ប្តីរបស់គាត់នៅក្នុងទិវានៃសេចក្តីស្រលាញ់កន្លងទៅនេះគឺគាត់បានព្រីនរូបថតស្រីស្អាតជាច្រើនដែលប្តីរបស់គាត់បានចុច Like នៅក្នុងបណ្តាញសង្គម Instagram មករៀបជាកាដូសម្រាប់ប្តី។ បើយោងតាមការចុះផ្សាយនៅក្នុងសារព័ត៌មាន Daily Mail បានឲ្យដឹងថា ស្រ្តីរូបនេះមានឈ្មោះក្នុងគណនី TikTok ថា Gloria និងកំពុងរស់នៅសហរដ្ឋអាមេរិក។

នៅក្នុងវីដេអូ TikTok របស់ស្រ្តីរូបនេះបានបង្ហាញថា គាត់បានព្រីនរូបថតមនុស្សស្រីជាច្រើនសន្លឹកតូចៗនិងបានបិទរូបថតទាំងនោះជាមួយនិងចង្កាក់ឈើតូចល្មមហើយដោតនៅលើស្នោសម្រាប់យកទៅជូនប្តី ហើយកាដូមួយនេះគឺជាការឌឺដងឲ្យប្តីរបស់គាត់ដែលតែងតែចុច Like រូបភាពស្រីស្អាតនៅក្នុងបណ្តាញសង្គម។ វីដេអូមួយនេះមានអ្នកចូលមើលរហូតដល់ជាង ៤,៤ លានដង ហើយក្រុមអ្នកប្រើប្រាស់បណ្តាញសង្គមថែមទាំងបានដាក់ឈ្មោះឲ្យអ្នកស្រី Gloria ថា ‘The Queen of Petty’  ទៀតផង៕

អត្ថបទ៖ ភក្តី

ប្រភព៖ Daily Mail