លោកឧកញ៉ា ម៉ុង ឬទ្ធី ស្លៀកពាក់ធម្មតា ជិះឡាន Pick up ចូលរួមពិធីមង្គលការ ស្រាប់តែមានគេសួរលោកថា ទើបមកពីចំការឬ? ហើយសន្តិសុខដេញឡានលោកឲ្យចតឆ្ងាយពីគេ , ពេលនេះលោកបានផ្តល់ដំបូន្មានដ៏មានអត្ថន័យមួយ
- January 10, 2022
ឧកញ៉ាបណ្ឌិត ម៉ុង ឬទ្ធី ដែលប្រជាពលរដ្ឋជាច្រើនបានស្គាល់ ដោយសារតែលោកល្បីល្បាញមានចិត្តសប្បុរស ជួយអ្នកក្រីក្រ ដូចជាបង្កើតការងារទាក់ទងនឹងវិស័យកសិកម្ម ធ្វើផ្ទះ និងបង្កើតសាលារៀន មន្ទីរពេទ្យ ផ្លូវថ្នល់ជាច្រើនជួយដល់សង្គមជាតិ។ កាលពីពេលថ្មីៗនេះលោកឧកញ៉ាបានបង្ហោះនៅលើបណ្តាញសង្គមហ្វេសបុក ទាក់ទិននឹងរឿងចូលរួមពិធីអាពាហ៍ពិពាហ៍បានជិះឡាន Pick up និងស្លៀកសំលៀកបំពាក់ធម្មតា ត្រូវបានសន្តិសុខដេញឲ្យចតឡានឆ្ងាយពីគេ លោកបានទូន្មានថា ៖ ” ត្រូវចងចាំទុកក្នុងអារម្មណ៍ជានិច្ចថា គ្រឿងសម្ភារក្រៅខ្លួនទាំងអស់ និងខ្លួនមិនមែនជារបស់យេីងទេ កិត្តិយសនិងសេចក្ដីថ្លៃថ្នូរទេីបវាជារបស់យេីងពិតប្រាកដណាកូនចៅ”។
ខាងក្រោមនេះជាសំណេររបស់លោក៖ ” ព្រឹកថ្ងៃទី១០ ខែកញ្ញា ឆ្នាំ១៩៩៣ ចុះមកពិនិត្យមេីលការរៀបចំផ្ទុក ជ័រកៅស៊ូបង្កកចូលនាវានៅចុងខាងជេីងផែថ្មភ្នំពេញ ដេីម្បីនាំចេញទៅកាន់ប្រទេសសឹង្ហបុរី បានឃេីញសកម្មភាពក្រុមវិស្វករ ដែលកំពុងតែនាំគ្នាមមាញឹក តភ្ជាប់ស្ពានជ្រោយចង្វាឡេីងវិញ ក្រោយពីត្រូវបានកាត់ផ្តាច់ដោយសារតែសង្រ្គាមឆ្នាំ៧០ មានឱកាសបន្តិចដោយសារតែទេីបនិងទិញរថយន្តBMW525 ថ្មីដំបូងគេពីម្តុំខាងជេីងអាងទឹកអូឡាំពិក កាលណោះអាយុទេីបតែ៣៩ឆ្នាំរាងដូចជាសង្ហារបន្តិចដែរ មានជញ្ជៀន នាឡិកាដៃ និងខ្សែក ហេីយទេីបតែចេះពាក់ស្បែកជើងឃ្លប់ដំបូងផង ដូចជានៅរាងភ្លេីតភ្លេីនចង់សំញ៉ែងគេឯងផង ក៏រកគេថតមួយប៉ុស្តិ៍រក្សាទុករហូតមកដល់ពេលនេះ២៩ឆ្នាំហេីយ មេីលឃេីញរូបនេះម្តងៗដូចជាខ្មាស់គេបន្តិចដែ តែជាបន្តបន្ទាប់ខ្ញុំបានលះបង់អស់ហេីយខ្សែក ជញ្ជៀន នាឡិកាដៃ នៅសល់តែឡានបេីមិនជិះទៅណាមកណាមិនរួចទេ ។
យប់មិញ6pm09.01.22ទៅចូលរួមក្នុងពិធីមង្គលការ របស់កូនលោកហេង វណ្ណដា នៅសណ្ឋាគារសូហ្វីតែល គេឃេីញខ្ញុំមានសម្លៀកបំពាក់មិនសមរម្យ ជិះរថយន្តពីកឹបគេសួរខ្ញុំថាទេីបតែមកពីចំការឬ ដោយសារតែភាគច្រេីនគេស្លៀកពាក់អាវធំ ជិះរថយន្តសុតតែទំនេីបៗមកចូលរួម រថយន្តខ្ញុំសន្តិសុខដេញអោយទៅចតឆ្ងាយពីគេ សូមកូនចៅត្រូវចងចាំទុកក្នុងអារម្មណ៍ជានិច្ចថា គ្រឿងសម្ភារក្រៅខ្លួនទាំងអស់និងខ្លួនមិនមែនជារបស់យេីងទេ កិត្តិយសនិងសេចក្ដីថ្លៃថ្នូរទេីបវាជារបស់យេីងពិតប្រាកដណាកូនចៅ ៕”
- Share This Post: