រាជធានីភ្នំពេញ៖ យោងតាមការចុះផ្សាយរបស់ ក្រសួងព័ត៌មាន បានឲ្យដឹងថា គិតត្រឹមថ្ងៃទី១៩ ខែមករា ឆ្នាំ២០២២នេះ បងប្អូនប្រជាពលរដ្ឋ រួមជាមួយជនបរទេសដែលនៅព្រះរាជាណាចក្រកម្ពុជាប្រមាណជាង ១៤លាន៣សែននាក់ហើយ បានចាក់វ៉ាក់សាំងដូសទី១ ហើយចំនួនជាង ១៣លាន៧សែននាក់ បានចាក់វ៉ាក់សាំងដូសទី២ ឬដូសមូលដ្ឋាន។ នេះបើយោងតាមរបាយការណ៍របស់ក្រសួងសុខាភិបាល។

សម្រាប់ក្រុមដែលមានអាយុចាប់ពី ១៨ឆ្នាំឡើងទៅ មានចំនួន ១០ ១៨២ ០៩៥ នាក់ បានចាក់ដូសទី១ និងចំនួន ៩ ៨៣១ ៧៦៩ នាក់ បានចាក់ដូសទី២ ដែលស្មើនឹង ១០១.៨២% នៃប្រជាជនគោលដៅសរុប ១០លាននាក់។ ដោយឡែកសម្រាប់យុទ្ធនាការចាក់វ៉ាក់សាំងដូសជំរុញវិញ សម្រេចចាក់ដូសទី៣បានចំនួន ៤ ៥៥៦ ៧៨៥ នាក់ ហើយចំនួន ១២៩ ៨២១ នាក់ បានចាក់ដូសទី៤។

ចំពោះកុមារ និងយុវវ័យ អាយុចាប់ពី ១២ឆ្នាំ ដល់ក្រោម ១៨ឆ្នាំវិញ អ្នកចាក់ដូសទី១ មានចំនួន ១ ៨១៥ ១០៩ នាក់ និងអ្នកចាក់ដូសទី២ មានចំនួន ១ ៧៣៥ ១៥៥ នាក់ ដែលស្មើនឹង ៩៩.៣៣% នៃក្រុមគោលដៅសរុបដែលមានចំនួនជាង ១លាន៨សែននាក់។

ក្នុងនោះផងដែរ ចំពោះកុមារ អាយុចាប់ពី ០៦ឆ្នាំ ដល់ក្រោម ១២ឆ្នាំ អ្នកចាក់ដូសទី១ មានចំនួន ២ ០០៤ ៨៨០ នាក់ និងអ្នកចាក់ដូសទី២ មានចំនួន ១ ៩១៣ ៩២៥ នាក់ ដែលស្មើនឹង ១០៥.៦៧% នៃក្រុមគោលដៅសរុបជិត ១លាន៩សែននាក់។ ចំពោះកុមារ អាយុ ០៥ឆ្នាំ ដែលមានចំនួនប្រមាណជាង ៣០ម៉ឺននាក់ សម្រេចចាក់បាន ៣១៦ ៣៦៤ នាក់ សម្រាប់ដូសទី១ និងចំនួន ២៣៩ ៥៧០ នាក់ បានចាក់ដូសទី២ ដែលស្មើនឹង ១០៣.៩៦%។

បើគិតជាចំនួនប្រជាពលរដ្ឋសរុប ១៦លាននាក់ ការងារចាក់វ៉ាក់សាំងសម្រេចបាន ៨៩.៤៩% ដែលជាតួលេខមួយដ៏ខ្ពស់ នៅក្នុងចំណោមប្រទេសនៅក្នុងតំបន់ និងពិភពលោក៕

ប្រភព៖ ក្រសួងព័ត៌មាន