ព្រឹកនេះ! ព្រះមហាក្សត្រ និងសម្ដេចម៉ែ យាងប្រោសព្រះរាជទាន ធូបទាន កម្រងផ្កា ក្នុងពិធីសង្ឈទានឧទ្ទិសកុសលដល់វិញ្ញាណក្ខន្ធវេជ្ជបណ្ឌិត Beat Richner
នាវេលាព្រឹកថ្ងៃព្រហស្បតិ៍ ១៤រោច ខែកត្តិក ឆ្នាំច សំរឹទ្ធស័ក ព.ស ២៥៦២ ត្រូវនឹងថ្ងៃទី០៦ ខែធ្នូ ឆ្នាំ២០១៨ ព្រះករុណាជាអម្ចាស់ជីវិតលើត្បូង ព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា និងសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ក្នុងសេរីភាព សេចក្តីថ្លៃថ្នូរ និងសុភមង្គល ជាទីគោរពសក្ការៈដ៏ខ្ពង់ខ្ពស់បំផុត សព្វព្រះរាជហឫទ័យស្តេចយាងប្រោសព្រះរាជទាន ធូបទាន កម្រងផ្កា ជូនចំពោះអដ្ឋិធាតុ ឯកឧត្តមសាស្ត្រាចារ្យវេជ្ជបណ្ឌិត Beat Richner និងស្តេចយាងជាព្រះរាជាធិបតីដ៏ខ្ពង់ខ្ពស់បំផុត ក្នុងពិធីសង្ឈទានឧទ្ទិសកុសលចំពោះវិញ្ញាណក្ខន្ធ ឯកឧត្តមសាស្ត្រាចារ្យវេជ្ជបណ្ឌិត Beat Richner នៅក្នុងបរិវេណមន្ទីរពេទ្យកុមារគន្ធបុប្ផា នៃខេត្តសៀមរាប។ នេះយោងតាមការបង្ហោះរបស់ហ្វេសប៊ុកផេក Royal du Cambodge។
មរណភាពរបស់ឯកឧត្តមសាស្រ្តាចារ្យវេជ្ជបណ្ឌិត BEAT RICHNER គឺជាការបាត់បង់ដ៏ធំធេង មិនត្រឹមតែចំពោះក្រុមគ្រួសារប៉ុណ្ណោះទេ តែក៏ជាការបាត់បង់នូវធនធានមនុស្សដ៏សំខាន់មួយរូប ដែលប្រជាពលរដ្ឋទូទាំងប្រទេសកម្ពុជា មានការរន្ធត់និងសោកស្តាយជាពន់ពេក ព្រោះតែជនជាតិស្វីសរូបនេះ បានចំណាយពេលស្ទើរពេញមួយជីវិតរបស់លោក ដើម្បីជួយសង្រ្គោះជីវិតកុមារកម្ពុជារាប់លាននាក់។តាមរយៈការបង្កើតមន្ទីរពេទ្យគន្ធបុប្ផា និងផ្តល់សេវាព្យាបាលដោយពុំគិតថ្លៃសម្រាប់កុមារ ដែលបានរួមចំណែកយ៉ាងសំខាន់ក្នុងការអភិវឌ្ឍន៍វិស័យសុខាភិបាលក្នុងព្រះរាជាណាចក្រកម្ពុជា៕
ប្រភព៖ Royal du Cambodge