ក្រុមហ៊ុន Boeing បានអះអាងថា យន្តហោះ Boeing Co 737 MAX ពិតជាមានសុវត្ថិភាពគ្រប់គ្រាន់សម្រាប់អ្នកដំណើរ

អគ្គនាយកក្រុមហ៊ុនផលិតយន្តហោះ Boeing បានថ្លែងនៅក្នុងសន្និសទ្ធិសារព័ត៌មានក្នុងទីក្រុង ចាកាតា ប្រទេសឥណ្ឌូនេស៊ីថា យន្តហោះ Boeing Co 737 MAX ដែលជាផលិតផលថ្មីរបស់ក្រុមហ៊ុនខ្លួនពិតជាមានសុវត្ថិភាព ១០០ % សម្រាប់អ្នកដំណើរ និងមិនមានបញ្ហាបច្ចេកទេសដូចយន្តហោះដែលបានធ្លាក់ចូលក្នុងសមុទ្រចាវ៉ាកាលពីពេលថ្មីៗនេះទេ។ ការថ្លែងដូចនេះគឺដើម្បីផ្តល់ទំនុកចិត្តសម្រាប់អ្នកដំណើរ និងឲ្យពួកគាត់ឈប់បារម្ភទៀតថា យន្តហោះរបស់ក្រុម Boeing គ្មានសុវត្ថិភាពក្នុងការធ្វើដំណើរ។ យន្តហោះប្រភេទថ្មីនេះត្រូវបានគេដាក់លក់ក្នុងតម្លៃប្រមាណជា ២២ លានដុល្លារ ហើយរហូតមកទល់នឹងពេលនេះយន្តហោះប្រភេទនេះត្រូវបានគេបញ្ជាទិញអស់ចំនួន ១៩៧ គ្រឿងហើយ។

សូមរម្លឹកឡើងវិញថា កាលពីពេលថ្មីៗនេះយន្តដឹកអ្នកដំណើរមួយគ្រឿងរបស់ក្រុមហ៊ុនអាកាសចរណ៍ lion Air ដែលបច្ចេកវិទ្យារបស់យន្តហោះជាផលិតផលរបស់ក្រុមហ៊ុន Boeing បានធ្លាក់ចូលទៅក្នុងសមុទ្រចាវ៉ា ប្រទេសឥណ្ឌូនេស៊ី ព្រោះតែយន្តហោះមានបញ្ហាបច្ចេកទេសបញ្ជូនព័ត៌មានទៅកាន់អ្នកបើកបរមិនបានត្រឹមត្រូវ ហើយគ្រោះថ្នាក់នោះបានសម្លាប់អ្នក ដំណើរចំនួន ១៨៩ នាក់។ ​ដោយកត្តានេះហើយ ទើបខាងក្រុមហ៊ុន Boeing ព្យាយាមអភិវឌ្ឍន៍ផលិតផលរបស់ខ្លួនឲ្យបានល្អ និងធានាថាវាពិតជាមានសុវត្ថិភាព ១០០ % សម្រាប់អ្នកធ្វើដំណើរគ្រប់រូប៕

អត្ថបទ៖ ភក្តី

ប្រភព៖ channelnewsasia