អ៊ឹម ជីវ៉ា និងអ្នកសិល្បៈឯទៀត ជួបគ្រោះថ្នាក់ក្រឡាប់ឡាន ពេលធ្វើដំណើរទៅចូលរួមបុណ្យសមុទ្រ នៅកោះកុង

មុននេះបន្តិច តារាសម្តែងលោក អ៊ឹម ជីវ៉ា បានបង្ហោះសារនៅលើបណ្តាញសង្គមហ្វេសប៊ុករបស់ខ្លួន ដោយបានបង្ហាញនូវអារម្មណ៍តក់ស្លុតព្រោះតែលោក និងក្រុមការងារឯទៀតបានជួបគ្រោះ នៅស្រុកស្រែអំបិល ខេត្តកោះកុង រហូតមានមនុស្សស្លាប់។

ដោយលោកសរសេរបែបនេះថា៖ “បងប្អូនអើយពេលនេះខ្ញុំមានបញ្ហាធំហើយឡានខ្ញុំជួបញ្ហាគ្រោះថ្នាក់ចរាចរណ៍ ក្រឡាប់ឡាននៅស្រុកស្រែអំបិល ពេលធ្វើដំណើរ ទៅចូលរួមបុណ្យសមុទ្រនៅខេត្តកោះកុង បណ្តាលអោយមានមនុស្សស្លាប់ម្នាក់។ តែខ្ញុំបាទនិងក្រុមការងារបួននាក់ទៀតមិនអីទេ លើកទី១ហើយខ្ញុំជួបរៀងរន្ធត់បែបនេះ ព្រះអើយជួយខ្ញុំផង ខ្ញុំមានឡានតែមួយគ្រឿងហ្នឹងទេទុកសំរាប់ទៅណាមកណាពេលនេះជាពិសេសកម្មវិធីសិល្បៈពេលនេះចប់ហើយ”។

គួររំលឹកផងដែលថាគ្រោះថ្នាក់ចរាចរណ៍បានកើតឡើង ដោយមាន រថយន្ត​ម៉ាក LEXUS ពីរ​គ្រឿង ​សន្ដោង​អូស​គ្នា  ស្រាប់តែ​បើក​ធ្លាក់​ផ្លូវ បណ្ដាល​ឲ្យ​ក្រឡាប់​មួយគ្រឿង នៅលើ​ផ្លូវជាតិ​លេខ៤៨ ក្នុង​ភូមិ​ជីខ ឃុំ​ជីខ​លើ ស្រុកស្រែ​អំបិល ខេត្តកោះកុង កាលពី​វេលា​ម៉ោង ៣ៈ៣០នាទី​ ទៀបភ្លឺ​ឈានចូល​ថ្ងៃទី១៤ ខែធ្នូ ឆ្នាំ២០១៨។ មុនពេលកើតហេតុ LEXUS ពាក់​ស្លាក​លេខ​ភ្នំពេញ 2H-9069 ពណ៌​ខ្មៅ និង​ ម៉ាក​LEXUS ពណ៌​ទឹកមាស ពាក់​ស្លាក​លេខ​ភ្នំពេញ 2AP-9487 បាន​សន្ដោង​អូស​គ្នា លុះមកដល់ចំណុចកើតហេតុ រថយន្តទាំង២បានធ្លាក់ពីផ្លូវ និង​ក្រឡាប់ រថយន្ត ​LEXUS ១គ្រឿង ពណ៌​ទឹកមាស បណ្តាលឲ្យបុរសជាបើកបររថយន្តបានស្លាប់៕