វិមានក្រឹមឡាំងបានបញ្ជាក់ថា ប្រធានាធិបតីរុស្ស៊ីលោក វ្ល៉ាឌីមៀ ពូទីន មិនអាចទៅចូលរួមក្នុងពិធីបុណ្យសពលោក Mikhail Gorbachev ដែលជាមេដឹកនាំចុងក្រោយនៃសហភាពសូវៀតនោះទេ។ អ្នកនាំពាក្យលោក Dmitry Peskov បានឱ្យដឹងថា កាលវិភាគការងាររបស់លោក ពូទីន នឹងមិនអនុញ្ញាតឱ្យគាត់អាចទៅចូលរួមក្នុងពិធីបុណ្យមរណទុក្ខនៅថ្ងៃសៅរ៍នេះបានទេ។ យ៉ាងណាក៏ដោយ លោក ពូទីន ក៏បានទៅគោរពវិញ្ញាណក្ខន្ធរបស់លោក Gorbachev នៅឯមន្ទីរពេទ្យក្នុងទីក្រុងមូស្គូផងដែរ នៅពេលដែលគាត់ត្រូវបានគេប្រកាសថា បានទទួលមរណភាព កាលពីថ្ងៃអង្គារក្នុងជន្មាយុ ៩១ឆ្នាំ ដោយរោគាពាធ។

ជម្រាបដែរថា លោក Gorbachev គឺជាមេដឹកនាំដែលជួយឱ្យមានការបញ្ចប់សង្គ្រាមត្រជាក់ដោយសន្តិវិធី ថ្វីបើគាត់មិនអាចស្រោចស្រង់សហភាពសូវៀតពីការដួលរលំនៃក៏ដោយ។ ប៉ុន្តែការដួលរលំនៃសហភាពសូវៀត គឺជាការសោកស្ដាយបំផុតរបស់លោក វ្ល៉ាឌីមៀ ពូទីន។ កាលពីឆ្នាំ២០០៥ ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយថា ការបែកបាក់នៃសហភាពសូវៀតគឺជា «មហន្តរាយភូមិសាស្ត្រនយោបាយដ៏ធំបំផុតនៃសតវត្សទី២០»។

ប៉ុន្តែយ៉ាងណា នៅក្នុងតេឡេក្រាមចូលរួមរំលែកទុក្ខដល់គ្រួសាររបស់ Gorbachev កាលពីថ្ងៃពុធ លោក ពូទីន ហាក់បានបណ្ដោយឱ្យរឿងអតីតកន្លងទៅតាមពេលវេលា និងពិពណ៌នាលោក Gorbachev ថាជា «អ្នកនយោបាយ និងជារដ្ឋបុរសដែលមានឥទ្ធិពលយ៉ាងខ្លាំង លើដំណើរប្រវត្តិសាស្ត្រពិភពលោក»។ កាល​ពី​ថ្ងៃ​ព្រហស្បតិ៍ ទូរទស្សន៍​រដ្ឋ​រុស្ស៊ី​ក៏បាន​បង្ហាញ​ពី លោក ពូទីន ដែលកំពុង​ដាក់​ផ្កា​កុលាប​ក្រហម​ក្បែរ​មឈូស​របស់ Gorbachev ក្នុង​មន្ទីរពេទ្យ Central Clinical Clinical ក្នុង​ទីក្រុង​ម៉ូស្គូ៕

អត្ថបទ៖ លីដា
ប្រភព៖ BBC