មេធាវីលោក Muhammad Shafee Abdullah បានឱ្យដឹងថា អតីតនាយករដ្ឋមន្ត្រីម៉ាឡេស៊ី គឺលោក Najib Razak ត្រូវបានបញ្ជូនទៅកាន់មន្ទីរពេទ្យ Kuala Lumpur (HKL) កាលពីថ្ងៃចន្ទម្សិលមិញនេះ ហើយអាចនឹងត្រូវបានបញ្ជូនទៅវិទ្យាស្ថានបេះដូងជាតិ (IJN) បន្ទាប់ពីនោះ ដែលធ្វើឱ្យដំណើរការកាត់ក្ដីលើសំណុំរឿង 1Malaysia Development ត្រូវផ្អាក។ មុននេះ លោកមេធាវីក៏បានប្រាប់តុលាការជាន់ខ្ពស់ថា លោក Najib កំពុងមានសម្ពាធឈាមឡើងចុះ ហើយត្រូវឆ្លងកាត់ការធ្វើតេស្តជាច្រើនដង ក្នុងរយៈពេលប៉ុន្មានថ្ងៃខាងមុខ ដើម្បីបញ្ជាក់ពីស្ថានភាពរបស់គាត់។

លោកមេធាវី​បាន​សុំ​ពន្យារពេល​សវនាការ​នៅ​ថ្ងៃ​អង្គារនេះ ដោយសារ​គាត់​មិន​អាច​អារកាត់លើសំណុំរឿង 1MDB ដោយសារ​គាត់​មិន​ត្រូវ​បាន​អនុញ្ញាត​ឱ្យ​ទៅ​ជួប​លោក Najib នៅក្នុង​មន្ទីរពេទ្យបានទេ។ ជាមួយគ្នានេះដែរ ព្រះរាជអាជ្ញារងលោក Mohamad Mustaffa P Kunyalam ក៏មិនបានជំទាស់នឹងការពន្យារពេលនោះទេ។ បន្ទាប់មកទើបចៅក្រមលោក Collin Lawrence Sequerah បានសម្រេចពន្យារពេលដំណើរការនេះ ទៅរសៀលថ្ងៃពុធវិញ។

គួរឱ្យដឹងដែរថា លោក Najib Razak អាយុ ៦៩ឆ្នាំ កំពុងប្រឈមមុខនឹងការចោទប្រកាន់ចំនួន ៤ ពីបទប្រើប្រាស់តួនាទីរបស់គាត់ ដើម្បីទទួលបានសំណូកសរុបចំនួន ២.២៨ ពាន់លានរីងហ្គីត (ជាង ៥០០ លានដុល្លារ) ពីមូលនិធិគម្រោង 1MDB និង ២១ ករណី ពីបទលាងលុយកខ្វក់ដែលពាក់ព័ន្ធនឹងចំនួនទឹកប្រាក់ដូចគ្នានោះ៕

អត្ថបទ៖ លីដា
ប្រភព៖ The Nation Thailand