កូរ៉េខាងត្បូងបានពិន័យក្រុមហ៊ុន Google និង Meta ច្រើនជាង ៧០ លានដុល្លាអាមេរិក ចំពោះការបំពានឯកជនភាពរបស់អ្នកប្រើប្រាស់

ប្រទេសកូរ៉េខាងត្បូងនៅថ្ងៃពុធ ទី១៤ ខែកញ្ញា ឆ្នាំ២០២២ នេះបានឱ្យដឹងថា ខ្លួនបានពិន័យជាប្រាក់រាប់លានដុល្លារលើ Google និងបណ្ដាញសង្គមនានា របស់ក្រុមហ៊ុន Meta សម្រាប់ការបំពានច្បាប់ឯកជនភាព ខណៈដែល Meta ពិចារណាប្រឆាំងនឹងការសម្រេចចិត្តនៅក្នុងតុលាការកូរ៉េខាងត្បូង។ នៅក្នុងសេចក្តីថ្លែងការណ៍មួយ គណៈកម្មការការពារព័ត៌មានផ្ទាល់ខ្លួន បាននិយាយថា ខ្លួនបានពិន័យ Google ចំនួន ៦៩.២ ពាន់លានវ៉ុន (៥០ លានដុល្លារ) និង Meta ចំនួន ៣០.៨ ពាន់លានវ៉ុន (២២ លានដុល្លារ) សម្រាប់ការបំពានឯកជនភាព ប៉ុន្តែយ៉ាងណា Google នៅមិនមានមតិយោបល់ភ្លាមៗនោះទេ។

តាមសម្ដីអ្នកនាំពាក្យរបស់ Meta បាននិយាយថា៖«ខណៈពេលដែលយើងគោរពការសម្រេចចិត្តរបស់គណៈកម្មាការ យើងមានទំនុកចិត្តថា យើងធ្វើការជាមួយអតិថិជនរបស់យើងតាមរបៀបស្របច្បាប់ ដែលបំពេញតាមដំណើរការ តម្រូវដោយបទប្បញ្ញត្តិក្នុងស្រុក។ ដូច្នេះហើយយើងមិនយល់ស្របនឹងការសម្រេចចិត្តរបស់គណៈកម្មាការទេ ហើយនឹង បើកទូលាយចំពោះគ្រប់ជម្រើស រួមទាំងការស្វែងរកសេចក្តីសម្រេចពីតុលាការ»។ គណៈកម្មការការពារព័ត៌មានផ្ទាល់ខ្លួនបាននិយាយថា ក្រុមហ៊ុនមិនបានជូនដំណឹងយ៉ាងច្បាស់ដល់អ្នកប្រើប្រាស់សេវាកម្ម និងសុំការយល់ព្រមជាមុននៅពេលប្រមូល និងវិភាគព័ត៌មានអំពីអាកប្បកិរិយា ដើម្បីសន្និដ្ឋានអំពីចំណាប់អារម្មណ៍របស់ពួកគេ ឬប្រើប្រាស់វា សម្រាប់ការផ្សាយពាណិជ្ជកម្មតាមតម្រូវការ៕

អត្ថបទ៖ លីដា
ប្រភព៖ Channel News Asia