បងប្អូនដែលឧស្សាហ៍អុជធូបគួរតែប្រយ័ត្ន! ស្ត្រីជនជាតិថៃម្នាក់រកឃើញថា ខ្លួនកើតជំងឺមហារីកសួត ដោយសារតែស្រូបផ្សែងធូប ដែលអុជរាល់ថ្ងៃ អស់រយៈពេលជាង៦ឆ្នាំ

ថៃ៖ កាលពីថ្ងៃទី១៥ ខែកញ្ញា ឆ្នាំ២០២២ កន្លងមក លោកវេជ្ជបណ្ឌិត Manoon Leechawengwong វេជ្ជបណ្ឌិតឯកទេសជំងឺផ្លូវដង្ហើមនៃមន្ទីរពេទ្យ Wichaiyut ប្រទេសថៃ បានធ្វើការបង្ហោះសារតាមរយៈបណ្តាញសង្គមហ្វេសប៊ុក “Ms. Manoon Leechawengwong FC” អំពីជំងឺមហារីកសួត ដោយបញ្ជាក់ថា៖ មហារីកសួត គឺជាមហារីកទូទៅ ប្រសិនបើរកឃើញដំបូងក្នុងដំណាក់កាលដំបូង ដំណាក់កាលទី ១-២ អាចព្យាបាលបានដោយការវះកាត់។

បន្ទាប់ពីមានអ្នកជំងឺស្ត្រីអាយុ ៦៥ ឆ្នាំម្នាក់កាលពី ៧ ឆ្នាំមុនបានធ្វើការពិនិត្យរាងកាយប្រចាំឆ្នាំ ហើយ​ថត​កាំរស្មីអ៊ិច​សួត​ជា​រៀង​រាល់​ឆ្នាំ រក​ឃើញ​ដុំ​តូចៗ​នៅ​សួត​ខាង​លើ​ ផ្នែកខាងក្រោយ ដោយរំលងមកអស់​រយៈពេល​១​ឆ្នាំ ដុំ​ពក​នេះ​រីក​ធំឡើង​ទើប​មក​សុំការពិគ្រោះ​ជាមួយ​គាត់ ដោយអ្នកជំងឺ​គ្មាន​រោគ​សញ្ញា មិន​ក្អក មិន​ក្តៅ មិន​ហត់​ទេ មិនឈឺទ្រូង មិនស្រកទម្ងន់ ហើយក៏មិនធ្លាប់ជក់បារីផងដែរ មានតែជំងឺលើសឈាមតែប៉ុណ្ណោះ លើសពីនេះទៅទៀតស្ត្រីរូបនេះតែងតែ អុជធូប២០ដើម នៅកន្លែងធ្វើការរៀងរាល់ថ្ងៃព្រហស្បតិ៍ អស់រយៈពេលជាង៦ឆ្នាំ។

ក្រោយពីបានធ្វើការស្កេនសួត ដុំពកមួយត្រូវបានរកឃើញនៅក្នុងសួតខាងឆ្វេងផ្នែកខាងលើ។ បន្ទាប់មកក៏បានធ្វើការ PET ស្កេន ដោយសារតែដុំសាច់នោះជាមហារីកសួត សំណាងល្អដែលវាមិនរីករាលដាលដល់សរីរាង្គផ្សេងទៀត រីឯក្នុងបំពង់ខ្យល់ ក៏មិនមានភាពខុសប្រក្រតី ទើបស្ត្រីរូបនោះបានទទួលការវះកាត់សួត។

សរុបមក អ្នកជំងឺនេះដែរមិនមានរោគសញ្ញា ហើយក៏មិនដែលជក់បារី ប៉ុន្តែបានដកដង្ហើមដោយស្រូបផ្សែងធូបចូល ជាហេតុបង្កអោយកើត ជំងឺមហារីកសួតដំណាក់កាលទី 2A (មហារីកសួតដំណាក់កាលទី 2A គឺជាមហារីកដែលមានទំហំ ៤-៥ សង់ទីម៉ែត្រ) ហើយមិនរីករាលដាលចូលទៅក្នុងក្រពេញទឹករង៉ៃទេ បន្ទាប់ពីទទួលការវះកាត់បានរយៈពេល ៧ឆ្នាំមក អ្នកជំងឺក៏ហាក់មិនមានអ្វីគួរអោយព្រួយបារម្មណ៍ទៀតទេ ពោលគឺជាដាច់ពីមហារីកតែម្តង ហើយស្ត្រីរូបនោះក៏លែងអុជធូបទៀតហើយដែរ៕

អត្ថបទ៖ Bee
ប្រភព៖ Thirath