កុមារចំនួន ១១នាក់ ត្រូវបានបាត់បង់ជីវិត និង ១៥នាក់ កំពុងបាត់ខ្លួន នៅក្នុងការវាយប្រហារដោយឧទ្ធម្ភាគចក្រ លើសាលារៀនមួយក្នុងប្រទេសមីយ៉ាន់ម៉ា

យូនីសេហ្វ បាននិយាយថា យ៉ាងហោចណាស់មានកុមារ ១១ នាក់ ត្រូវបានសម្លាប់ នៅក្នុងការវាយប្រហារ ដោយឧទ្ធម្ភាគចក្រ ទៅលើសាលារៀនមួយ នៅភាគពាយ័ព្យប្រទេសមីយ៉ាន់ម៉ា។ ក្រុមអ្នកគាំទ្រ​លទ្ធិប្រជាធិបតេយ្យ​របស់​ប្រទេសនេះ​ជឿ​ថា ការ​វាយ​ប្រហារ​នេះ​ត្រូវ​បាន​ធ្វើ​ឡើង​ដោយពួក​យោធា។ យូនីសេហ្វមីយ៉ានម៉ា បាននិយាយថា ការវាយប្រហារតាមអាកាសនេះ បានធ្វើឡើងកាលពីថ្ងៃសុក្រ នៅក្នុងទីក្រុង Sagaing ។ ខ្លួនបាននិយាយថា យ៉ាងហោចណាស់កុមារ ១៥នាក់ នៅតែបាត់ខ្លួន ហើយព័ត៌មានលម្អិតបន្ថែមកំពុងត្រូវបានបញ្ជាក់។

រដ្ឋាភិបាលរួបរួមជាតិដែលគាំទ្រលទ្ធិប្រជាធិបតេយ្យបាននិយាយនៅក្នុងសេចក្តីថ្លែងការណ៍មួយថា ទាហានបានឃាត់ខ្លួនកុមារ និងគ្រូបង្រៀនប្រហែល ២០ នាក់ បន្ទាប់ពីការវាយប្រហារនោះ។ ហើយយោធា​និយាយ​ថា ខ្លួន​​គ្រាន់តែបាញ់​តបត បន្ទាប់​ពី​រង​ការ​វាយ​ប្រហារ​ដោយ​ក្រុម​ប្រដាប់​អាវុធ។ គួរឱ្យដឹងដែរថា កុមារត្រូវបានជាប់គាំងនៅក្នុងជម្លោះរបស់មនុស្សធំ ចាប់តាំងពីយោធាបានឡើងកាន់អំណាចក្នុងរដ្ឋប្រហារកាលពីឆ្នាំមុន។ កាលពីខែមិថុនា អ្នករាយការណ៍ពិសេសរបស់អង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសមីយ៉ាន់ម៉ាបាននិយាយថា មនុស្សជាង ២៥០,០០០ នាក់ ត្រូវបានផ្លាស់ទីលំនៅ ហើយជាង ៣៨០ នាក់ បានស្លាប់ ឬរងរបួសយ៉ាងធ្ងន់ធ្ងរ៕

អត្ថបទ៖ លីដា
ប្រភព៖ បាងកកប៉ុស្ដិ៍