ប្រធានាធិបតីបារាំងលោក អេម៉ានុយអ៊ែល ម៉ាក្រុង (Emmanuel Macron) បានថ្កោលទោសចំពោះការឈ្លានពានរបស់រុស្ស៊ី ទៅលើប្រទេសអ៊ុយក្រែន ដោយបាននិយាយថា វាតំណាងឱ្យការវិលត្រឡប់ទៅកាន់ចក្រពត្តិនិយម និងយុគសម័យនៃអាណានិគមនិយម។ លោក ម៉ាក្រុង បានថ្លែងបែបនេះទៅកាន់មហាសន្និបាតអង្គការសហប្រជាជាតិកាលពីថ្ងៃអង្គារ ដោយលោកបានបន្ថែមថា ប្រទេសរុស្ស៊ីបានបំពានដោយចេតនានូវធម្មនុញ្ញរបស់អង្គការសហប្រជាជាតិ បើទោះបីជាប្រទេសនេះ ជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិក៏ដោយ។

ប្រធានាធិបតីលោក ម៉ាក្រុង បាននិយាយថា ទីក្រុងមូស្គូបានសម្រេចចិត្តត្រួសត្រាយផ្លូវសម្រាប់សង្គ្រាមឧបសម្ព័ន្ធនាពេលអនាគត ដែលកើតមានឡើងនៅអឺរ៉ុប អាស៊ី ឬអាហ្រ្វិក។ លោក​ថា នេះ​តំណាង​ឱ្យ​ការ​វិល​ត្រឡប់​ទៅ​ចក្រពត្តិនិយម និង​យុគសម័យ​អាណានិគមនិយម។ លោកក៏បានកត់សម្គាល់ដែរថា កង្វះខាតថាមពល និងអាហារដែលបណ្តាលមកពីការឈ្លានពានរបស់យោធារុស្ស៊ី អាចនឹងធ្វើឱ្យមានការបែងចែកសហគមន៍អន្តរជាតិ។

លោកបានអំពាវនាវឱ្យមានសាមគ្គីភាពក្នុងចំណោមប្រជាជាតិនានា ហើយលោក​បាន​មាន​ប្រសាសន៍​ថា ប្រទេស​ដែលមាន​អព្យាក្រឹត និង​នៅ​ស្ងៀម​សព្វថ្ងៃ គឺ​បម្រើ​បុព្វហេតុ​នៃ​ចក្រពត្តិនិយម​បែប​ថ្មី ហើយ​ក្លាយ​ជា​អ្នក​ទទួល​ខុស​ត្រូវ​ចំពោះ​ប្រវត្តិសាស្ត្រ។ លោក​បានបន្ថែម​ថា គោល​ជំហរ​របស់​បារាំង​ចំពោះ​សន្តិភាព​តែងតែ​មាន​ភាព​ច្បាស់លាស់។ លោក​បាន​ចង្អុល​បង្ហាញ​ថា ទីក្រុង​ប៉ារីស​បាន​ចាប់​ផ្តើម​ចូល​រួម​ក្នុង​កិច្ច​សន្ទនា​ជាមួយ​ក្រុង​មូស្គូ​ នៅមុន​ពេល​ការ​ឈ្លាន​ពាន​ចាប់​ផ្តើមទៅទៀត៕

អត្ថបទ៖ លីដា
ប្រភព៖ NHK