យោងតាមការចុះផ្សាយរបស់សារព័ត៌មាន BBC បានឱ្យដឹងថា ត្រីបាឡែនជាង ២០០ក្បាល បានជាប់គាំងនៅឆ្នេរសមុទ្រក្នុងរដ្ឋ Tasmania របស់ប្រទេសអូស្ត្រាលី យ៉ាងគួរឱ្យព្រួយបារម្ភបំផុត។ ពួកវាត្រូវបានគេរកឃើញនៅតំបន់ Macquarie Harbour នៅឆ្នេរសមុទ្រភាគខាងលិចរបស់រដ្ឋ ដែលធ្លាប់ជាកន្លែងមានការជាប់គាំងស្រដៀងគ្នាដ៏អាក្រក់បំផុតកាលពី ២ ឆ្នាំមុន ខណៈពាក់កណ្តាលនៃហ្វូងត្រីបាឡែនទាំងនោះ គឺហាក់ដូចជានៅមានជីវិតនៅឡើយ។ មូលហេតុនៃការជាប់គាំងនៅមិនទាន់មានការបញ្ជាក់នៅឡើយទេ ប៉ុន្តែក្រុមអ្នកជួយសង្គ្រោះត្រីបាឡែន កំពុងព្យាយាមជួយសង្គ្រោះក្រុមត្រីដែលនៅមានសង្ឃឹមរស់។

ឧប្បត្តិហេតុនេះបានកើតឡើងមួយថ្ងៃ បន្ទាប់ពីមានឧប្បត្តិហេតុដាច់ដោយឡែកមួយផ្សេងទៀត ដែលបានកើតឡើងនៅភាគខាងជើងរដ្ឋ Tasmania កាលពីថ្ងៃអង្គារ ដែលនាំឱ្យត្រីបាឡែនជំទង់ចំនួន ១៤ក្បាល បានស្លាប់ នៅលើកោះ King Island ក្នុងច្រកសមុទ្រ Bass ។ ចំណែកត្រីបាឡែនចំនួន ២៣០ ក្បាល ដែលត្រូវបានរកឃើញនៅតំបន់ Macquarie Harbour នៅថ្ងៃពុធនេះ ត្រូវបានគេជឿថា ជាត្រីបាឡែនប្រភេទ Pilot whales ដែលជាប្រភេទចូលចិត្តចេញមកជាហ្វូងធំៗ។

នាយកដ្ឋានបរិស្ថានរបស់រដ្ឋ Tasmania នៅក្នុងសេចក្តីថ្លែងការណ៍មួយបាននិយាយថា អ្នកជំនាញរបស់ពួកគេកំពុងរៀបចំផែនការជួយសង្គ្រោះ ប៉ុន្តែប្រតិបត្តិការនេះនឹងមានភាពស្មុគស្មាញ ដោយសារតែទីតាំងរបស់វាពិបាកទៅដល់។ Macquarie Harbor គឺជាច្រកចូលមានជម្រៅរាក់ដ៏ធំនៅក្នុងតំបន់ នៅឯឆ្នេរសមុទ្រភាគខាងលិចរបស់រដ្ឋ ហើយត្រីបាឡែនច្រើនទៀតត្រូវបានគេរំពឹងថា នឹងអាចផុតដង្ហើមនៅយប់នេះ៕

អត្ថបទ៖ លីដា
ប្រភព៖ BBC