ព្យុះសង្ឃរា Ian បានបោកបក់ចូលដល់រដ្ឋផ្លរីដាសហរដ្ឋអាមេរិក ក្នុងកម្រិតល្បឿន ២៤១ គីឡូម៉ែត្រក្នុងមួយម៉ោង
- BY
- autoadmin
- September 29, 2022
ព្យុះសង្ឃរា Ian បានបោកបក់ចូលដល់រដ្ឋផ្លរីដា ភាគខាងត្បូងសហរដ្ឋអាមេរិក ខណៈវាបានបណ្តាលឱ្យដាច់ចរន្តអគ្គិសនី និងទឹកជំនន់ ហើយមន្ត្រីអាជ្ញាធរកំពុងអំពាវនាវឱ្យប្រជាពលរដ្ឋមានការប្រុងប្រយ័ត្នខ្ពស់ដើម្បីសុវត្ថិភាព។ មន្ត្រីឧតុនិយមអាមេរិកបាននិយាយថា ព្យុះនេះបានបោកបក់ចូលដល់រដ្ឋនៅថ្ងៃពុធ ហើយវាគឺជាព្យុះប្រភេទទី៤ ដ៏គ្រោះថ្នាក់បំផុត។ វាមានកម្លាំងខ្យល់បក់រហូតដល់ ២៤១ គីឡូម៉ែត្រក្នុងមួយម៉ោង ហើយសម្ពាធស្នូលរបស់វាគឺ 940 hectopascals (ហេកតូប៉ាស្កាល់)។
អភិបាលរដ្ឋផ្លរីដា លោក Ron DeSantis បានប្រកាសដាក់រដ្ឋក្នុងគ្រាអាសន្ន និងបានជំរុញអ្នកស្រុកឱ្យគោរពតាមបទបញ្ជា និងការព្រមានអំពីការជម្លៀសខ្លួន ខណៈជើងហោះហើរជាច្រើនទៅកាន់រដ្ឋផ្លរីដាត្រូវបានលុបចោល ហើយសាលារៀនជាច្រើនត្រូវបានបិទ។ Walt Disney World នៅទីក្រុង Orlando បានប្រកាសថា ខ្លួននឹងបិទបរិក្ខាររបស់ខ្លួននៅថ្ងៃពុធ និងថ្ងៃព្រហស្បតិ៍។ មន្ត្រីឧតុនិយមអំពាវនាវឱ្យប្រជាពលរដ្ឋប្រុងប្រយ័ត្នចំពោះខ្យល់បក់ខ្លាំង ភ្លៀងធ្លាក់ខ្លាំង និងខ្យល់ព្យុះ ដោយព្រមានថា វាអាចបង្កការខូចខាតមហន្តរាយ និងគំរាមកំហែងអាយុជីវិតមនុស្ស។ កាលពីថ្ងៃអង្គារ ព្យុះសង្ឃរា Ian បានវាយប្រហារប្រទេសគុយបា ដោយបានផ្តាច់ការផ្គត់ផ្គង់ថាមពលនៅទូទាំងប្រទេស៕
អត្ថបទ៖ លីដា
ប្រភព៖ NHK
- Share This Post: