អាមេរិកប្រកាសដាក់ទណ្ឌកម្មលើបុគ្គល និងក្រុមហ៊ុនអាស៊ី ដែលគាំទ្រការបាញ់សាកល្បងមីស៊ីលរបស់កូរ៉េខាងជើង
- BY
- autoadmin
- October 11, 2022
សហរដ្ឋអាមេរិក៖ យោងតាមការចុះផ្សាយរបស់សារព័ត៌មាន Thairath បានរាយការណ៍ថា៖ លោក Vedant Patel អ្នកនាំពាក្យរងក្រសួងការបរទេសសហរដ្ឋអាមេរិក បាននិយាយថា រដ្ឋាភិបាលសហរដ្ឋអាមេរិកកំពុងចាត់វិធានការដាក់ទណ្ឌកម្មលើបុគ្គល និងក្រុមហ៊ុនអាស៊ី ដែលគាំទ្រការបាញ់សាកល្បងមីស៊ីលរបស់កូរ៉េខាងជើង ដោយបានរំលោភលើវិធានការហាមឃាត់របស់អង្គការសហប្រជាជាតិ។ សប្តាហ៍មុនមានករណី «ករណីបាញ់សាកល្បងមីស៊ីលរបស់កូរ៉េខាងជើងដែលបានបង្កើតភាពតានតឹងនៅឧបទ្វីបកូរ៉េ និងតំបន់ទាំងមូល» ដោយការិយាល័យគ្រប់គ្រងទ្រព្យសម្បត្តិបរទេសនៃក្រសួងរតនាគារសហរដ្ឋអាមេរិក នឹងកំណត់គោលដៅទៅល់ការដាក់ទណ្ឌកម្មបុគ្គលចំនួន២នាក់ និងក្រុមហ៊ុនរបស់សិង្ហបុរី កោះតៃវ៉ាន់ និងកោះ Marshall ។
តាមរយៈសេចក្តីរាយការណ៍ព័ត៌មានបានបញ្ជាក់ថា ក្រុមហ៊ុននៅក្នុងបញ្ជីទណ្ឌកម្មរួមមានក្រុមហ៊ុន Kek Kee Seng របស់សិង្ហបុរី ក្រុមហ៊ុនដឹកជញ្ជូន New Eastern ដែលមានមូលដ្ឋាននៅកោះ Marshall និងក្រុមហ៊ុន Chen Chee Huang របស់តៃវ៉ាន់ ដែលដឹកជញ្ជូនថាមពលប្រេងឥន្ធនៈ និងទំនិញទៅកាន់ប្រទេសកូរ៉េខាងជើង ដែលត្រូវបានគេចាត់ទុកថា ជាការគាំទ្រដល់ការអភិវឌ្ឍផ្នែយោធា និងគម្រោងអាវុធរបស់កូរ៉េខាងជើង។ រតនាគារសហរដ្ឋអាមេរិកក៏បានភ្ជាប់ទំនាក់ទំនង Anfasar Trading និង Swenzis Port Services ដែលបានចុះបញ្ជីនៅក្នុងប្រទេសសិង្ហបុរី ថាមានទំនាក់ទំនងជាមួយនឹងក្រុមហ៊ុន «Kek Kee Seng» ។
គួរបញ្ជាក់អោយដឹងផងដែរថា នេះជាការប្រកាសដាក់ទណ្ឌកម្មដំបូងរបស់អាមេរិក ប្រឆាំងនឹងកូរ៉េខាងជើង ចាប់តាំងពីស្ថានការណ៍នៅឧបទ្វីបកូរ៉េខាងជើងបានវិលមកមានកម្តៅវិញ ក្រោយកូរ៉េខាងជើងបានបាញ់មីស៊ីលចំនួន៦គ្រាប់ក្នុងរយៈពេលតិចជាងពីរសប្តាហ៍។ ចំណែករដ្ឋមន្ត្រីការបរទេសអាមេរិក លោក Anthony Blinken បាននិយាយថា៖ សហរដ្ឋអាមេរិកបានបញ្ជូនសញ្ញាច្បាស់លាស់ថា ខ្លួននឹងបន្តចាត់វិធានការប្រឆាំងយ៉ាងធ្ងន់ធ្ងរ ទៅនឹងក្រុមហ៊ុនដែលគាំទ្រការអភិវឌ្ឍន៍យោធា និងសព្វាវុធរបស់កូរ៉េខាងជើង ទោះបីជាយ៉ាងណាក៏ដោយ តំណាងរបស់កូរ៉េខាងជើងប្រចាំអង្គការសហប្រជាជាតិ មិនទាន់បានឆ្លើយតបចំពោះវិធានការចុងក្រោយនេះនៅឡើយទេ៕
អត្ថបទ៖ Bee
ប្រភព៖ Thairath
- Share This Post: