យោងតាមការចុះផ្សាយរបស់សារព័ត៌មាន CNN បានរាយការណ៍ថា នាយករដ្ឋមន្ត្រីនូវែលសេឡង់លោកស្រី Jacinda Arden នៅក្នុងសន្និសីទសារព័ត៌មានកាលពីថ្ងៃអង្គារ បានបញ្ជាក់ថា រដ្ឋាភិបាលរបស់លោកស្រីនឹងជំរុញដំណើរការច្បាប់ថ្មីមួយ ដែលនឹងតម្រូវឱ្យកសិករទាំងឡាយ ត្រូវបង់ពន្ធចំពោះការបញ្ចេញចោល (លាមក) របស់សត្វគោក្របី ឬចៀមរបស់ពួកគេ ដើម្បីជាផ្នែកមួយនៃការប្រយុទ្ធប្រឆាំងនឹងការប្រែប្រួលអាកាសធាតុ។ លោកស្រី Ardern បាននិយាយថា៖«នេះគឺជាជំហានដ៏សំខាន់មួយទៀតឆ្ពោះទៅមុខ ក្នុងការផ្លាស់ប្តូរប្រទេសនូវែលសេឡង់ ទៅកាន់អនាគតនៃការបំភាយឧស្ម័នទាប និងរក្សាការសន្យារបស់យើង ចំពោះការដាក់ពន្ធលើការបញ្ចេញចោលរបស់គោក្របីទាំងនោះ ចាប់ពីឆ្នាំ២០២៥តទៅ»។

ជម្រាបដែរថា នូវែលហ្សេឡង់គឺជាប្រទេសចិញ្ចឹម និងនាំចេញសាច់សត្វដ៏ធំបំផុតមួយ ហើយខ្លួនមានគោក្របីប្រមាណ ១០ លានក្បាល និងចៀម ២៦ លានក្បាល នៅទូទាំងប្រទេស។ វិស័យកសិកម្ម បានចូលរួមប្រមាណពាក់កណ្ដាលនៃការបំភាយឧស្ម័នសរុបរបស់ប្រទេស ដោយរួមមាន ៩១% គឺជាឧស្ម័នមេតាន ដែលជាឧស្ម័នផ្ទះកញ្ចក់ដ៏អាក្រក់ ជាមួយនឹងថាមពលកម្ដៅផែនដីច្រើនជាងកាបូនឌីអុកស៊ីតរហូតដល់ទៅ ៨០ដង នៅក្នុងរយៈពេលខ្លី។ ឥឡូវនេះ ​ក្រុម​កសិករមិនជឿលើការអះអាងនេះទេ និង​បាន​លើក​ឡើង​ពី​ការ​ព្រួយ​បារម្ភ​របស់ពួកគេ អំពី​ការ​ចំណាយ​ខ្ពស់​លើ​ឧស្សាហនេះ។

យ៉ាង​ណាក៏ដោយ សំណើ​នេះត្រូវបានគេ​សង្ឃឹម​ថា​ នឹង​លើក​ទឹក​ចិត្ត​កសិករ​ក្នុង​ការ​កាត់​បន្ថយ​ការ​បញ្ចេញ​ចោល ​ដោយ​មិន​កំណត់​តម្លៃ​ខូច​ខាត។ ក្នុង​សេចក្តី​ថ្លែងការណ៍ រដ្ឋាភិបាល​បាន​និយាយ​ថា ប្រាក់​ចំណូល​ដែល​បាន​ប្រមូល​បានពីការបង់ពន្ធ​នឹង​ត្រូវ​ «កែច្នៃ​ត្រឡប់​ទៅ​ក្នុង​វិស័យ​កសិកម្ម​វិញ​ តាម​រយៈ​បច្ចេកវិជ្ជា​ថ្មី ការ​ស្រាវជ្រាវ និង​ការ​ទូទាត់​ប្រាក់​លើក​ទឹកចិត្ត​ដល់​កសិករ»។ សំណើ​នេះ​នឹង​ចូល​ទៅ​ក្នុង​ការ​ពិគ្រោះ​យោបល់​ដែលគ្រោង​បញ្ចប់​នៅ​ខែ​វិច្ឆិកា​ឆ្នាំ​នេះ៕

អត្ថបទ៖ លីដា
ប្រភព៖ CNN