ថៃ៖ ស្នេហ៍ពិតមិនគិតពីអាយុ! លោកតាអាយុ ៧៨ឆ្នាំរៀបការជាមួយលោកយាយអាយុ ៦៨ឆ្នាំ ក្រោយស្គាល់គ្នាជាង ៣៦ឆ្នាំ
- BY
- autoadmin
- October 20, 2022
យោងតាមប្រភពសារព័ត៌មាន Thairath បានអោយដឹងថា កាលពីថ្ងៃទី១៥ ខែតុលា ឆ្នាំ២០២២ កន្លងទៅ នៅផ្ទះលេខ១ បាណន់រ៉ាក់ដាន ភូមិលេខ៩ ឃុំណងវ៉ាង ស្រុកឡាហានសៃ ខេត្តបុរីរ៉ាម បានរៀបចំពិធីមង្គលការយ៉ាងសាមញ្ញតាមប្រពៃណី ប៉ុន្តែអ្នកដែលបង្កើតការភ្ញាក់ផ្អើលនោះគឺគូស្វាមីភរិយាថ្មី រវាងលោក Tin Yongkhat អាយុ ៧៨ឆ្នាំ ត្រូវជាកូនកំលោះដែលបច្ចុប្បន្នមានតួនាទីជាលេខាអភិបាលក្រុង ណងវ៉ាង ជាមួយលោកយាយ Wichian Leelanoi អាយុ ៦៨ ឆ្នាំ ត្រូវជាកូនក្រមុំ ដែលត្រូវបានគេចាត់ទុកថាជាអាពាហ៍ពិពាហ៍ដំបូងរបស់កូនកំលោះនិងកូនក្រមុំមានវ័យចំណាស់បំផុត ដោយមានកូនចៅសាច់ញាតិទាំងសងខាង ក៏ដូចជាអ្នកជិតខាងបានមកចូលរួមចងដៃ ជាមួយនឹងការជូនពរជ័យនិងការអបអរសាទរ ទៅកាន់កូនកំលោះក្រមុំមួយគូរនេះ។
ចំណែក លោក Praphot Sotok ត្រូវជាមេភូមិ Rat Rakdan បានមានប្រសាសន៍ថា គាត់ជាគូស្វាមីភរិយាមានវ័យចាស់ទុំដំបូងបង្អស់របស់ភូមិ ដែលបានរៀបការ ដោយកន្លងមកតាធ្លាប់និយាយថា ចង់រៀបការ គាត់គិតថាគ្រាន់តែជាពាក្យសម្តីលេងសើចប៉ុណ្ណោះ។ លុះមកដល់ថ្ងៃនេះមានពិធីមង្គលការកើតឡើងពិតប្រាកដ លោកមេភូមិក៏មានការភ្ញាក់ផ្អើល និងចូលរួមត្រេងអរចំពោះអ្នកទាំងពីរ ដែលបានកាន់ដៃគ្នាមើលថែគ្នាជារៀងរហូតទៅ។
គួរបញ្ជាក់អោយដឹងផងដែរថា លោកតា Tin Yongkhat ជាកំលោះពោះម៉ាយ ចំណែកឯលោកយាយ Wichian Leelanoi ក៏ជាមេម៉ាយ លើសពីនេះទៅទៀតអ្នកទាំងពីរក៏ជាមិត្តនឹងគ្នាអស់រយៈពេលជាង ៣៦ឆ្នាំ មកហើយមុននឹងសម្រេចចិត្តរៀបការ។ រីឯកូនចៅរបស់អ្នកទាំងពីរក៏ចូលរួមត្រេកអរ គ្មានបញ្ហាជំទាស់អ្វីទេ ហេតុតែចង់អោយអ្នកទាំងពីរសេចក្តីសុខក្នុងជីវិតចុងក្រោយ និងមើលថែគ្នាក្នុងវ័យចាស់៕
អត្ថបទ៖ Bee
ប្រភព៖ Thairath
- Share This Post: