លោក Rishi Sunak នឹង​ក្លាយ​ជា​នាយក​រដ្ឋមន្ត្រី​ក្មេង​បំផុត​ក្នុង​ប្រវត្តិសាស្ត្ររាប់​សតវត្ស៍របស់អង់គ្លេស និង​ជា​ជនជាតិ​អង់គ្លេស​អាស៊ី​ដំបូង​គេបំផុត ដែលទទួលតួនាទីនេះ។ រំលឹកផងដែរថា លោក Sunak បានចាញ់អ្នកស្រី Liz Truss ក្នុងខែកញ្ញា នៅក្នុងការប្រណាំងចុងក្រោយ សម្រាប់ការជ្រើសរើសប្រធានបក្សអភិរក្ស។ គាត់​បាន​ក្លាយ​បុគ្គលដែលគេពេញចិត្តជាងគេ នៅពេល​ដែលអ្នកស្រី Liz Truss បាន​ប្រកាស​កាល​ពី​ថ្ងៃ​ព្រហស្បតិ៍​ថា ​អ្នកស្រីនឹង​លាលែង​ពី​តំណែងជានាយករដ្ឋមន្ត្រី។ បន្ទាប់​មកគូប្រជែង​ផ្សេង​ទៀត​របស់លោក ក៏បានដក​ខ្លួន​ចេញ​ក្នុង​កិច្ច​ខិត​ខំ​ប្រឹង​ប្រែង ​ដើម្បី​បញ្ចប់​ភាព​ចលាចល​ក្នុង​បក្ស​អភិរក្សនេះ។

លោក Sunak បាននិយាយកាលពីថ្ងៃចន្ទ នៅក្នុងសុន្ទរកថាជាសាធារណៈលើកដំបូងរបស់គាត់ថា៖«ឥឡូវនេះយើងត្រូវការស្ថិរភាព និងឯកភាព។ ហើយ​ខ្ញុំ​នឹង​ធ្វើ​វា​ជា​អាទិភាព​បំផុត​របស់​ខ្ញុំ ​ដើម្បី​នាំ​គណបក្ស​យើង​ និង​ប្រទេស​យើង​មក​ជាមួយ​គ្នា»។ ជម្រាបដែរថា លោក Sunak បានមើលការខុសត្រូវផ្នែកហិរញ្ញវត្ថុរបស់ចក្រភពអង់គ្លេសរយៈពេល ៣ ឆ្នាំ ខណៈពេលដែលកំពុងបម្រើការជាប្រធានលេខាធិការរតនាគារឱ្យអធិការបតីនៃ Exchequer ។ លោក Sunak ក៏ស្ថិត​ក្នុង​ចំណោម​អ្នក​មាន​បំផុត​នៅ​ចក្រភព​អង់គ្លេសផងដែរ។ លោក Sunak នឹងត្រូវជួបជាមួយស្តេច Charles នៅថ្ងៃអង្គារនេះ បន្ទាប់មកគាត់នឹងអាចបង្កើតរដ្ឋាភិបាលរបស់គាត់ជាស្ថាពរ៕

អត្ថបទ៖ លីដា
ប្រភព៖ NHK