លោក Rishi Sunak នឹងក្លាយជានាយករដ្ឋមន្ត្រីថ្មីរបស់អង់គ្លេស បន្ទាប់ពីបានជួបក្រាបបង្គំព្រះមហាក្សត្រនៅថ្ងៃអង្គារនេះ ហើយលោកនឹងត្រូវប្រកាសពីផែនការរបស់លោកសម្រាប់ចក្រភពអង់គ្លេស នៅក្នុងសុន្ទរកថាទៅកាន់សាធារណៈជនបន្ទាប់ពីនោះ។ មេដឹកនាំវ័យក្មេងបំផុតនៅក្នុងសម័យទំនើបរូបនេះ នឹងត្រូវថ្លែងសុន្ទរកថាទៅកាន់ពលរដ្ឋនៅខាងក្រៅផ្លូវ Downing St ប្រហែលម៉ោង ១១ និង ៣៥ នាទីរសៀល មុនពេលគាត់ចាប់ផ្តើមបង្កើតគណៈរដ្ឋមន្ត្រីថ្មី ក្នុងគោលបំណងបង្រួបបង្រួមគណបក្សអភិរក្សនិយមដែលកំពុងតែប្រេះស្រាំឡើងវិញ។

ប៉ុន្តែមុនពេលលោក Rishi Sunak នឹងចូលកាន់កាប់វិមាន​ 10 Downing Street (ការិយាល័យនាយករដ្ឋមន្ត្រី) អ្នកស្រី Liz Truss នឹងរៀបចំកិច្ចប្រជុំគណៈរដ្ឋមន្ត្រីចុងក្រោយ ក៏ដូចជាការថ្លែងសុន្ទរកថាលាគ្នា មុនពេលអ្នកស្រីធ្វើដំណើរទៅកាន់វិមាន Buckingham សម្រាប់ទស្សនិកជនចុងក្រោយរបស់អ្នកស្រី ជាមួយស្តេច Charles ។

ជម្រាបដែរថាលោក Sunak បានឈ្នះការប្រកួតជ្រើសរើសប្រធានបក្សអភិរក្សនិយមដោយគ្មានការបោះឆ្នោត បន្ទាប់ពីគូប្រជែងរបស់គាត់ គឺអ្នកស្រី Penny Mordaunt និងលោក Boris Johnson បានដកខ្លួនចេញពីការប្រកួតប្រជែង នៅក្នុងការផ្លាស់ប្តូរដ៏គួរឱ្យភ្ញាក់ផ្អើល បន្ទាប់ពីការចាញ់របស់គាត់ទៅឱ្យអ្នកស្រី Liz Truss កាលពីប៉ុន្មានសប្តាហ៍មុន។ អតីតអធិការបតីរូបនេះ នឹងក្លាយជានាយករដ្ឋមន្ត្រីហិណ្ឌូដំបូងគេ ជាជនជាតិអាស៊ីដំបូងគេ និងក្មេងជាងគេបំផុតក្នុងរយៈពេលជាង ២០០ឆ្នាំ របស់ចក្រភពអង់គ្លេស នៅអាយុត្រឹមតែ ៤២ ឆ្នាំប៉ុណ្ណោះ៕

អត្ថបទ៖ លីដា
ប្រភព៖ Standard UK